يامل قلبٍ مايبطل نزاعه = من يوم تطلع غرة الشمس وتغيب
نوبٍ يسيح ونوب يكفخ شراعه = ذيبٍ على الراعي يشن المهازيب
يلعب به الهاجوس والهم لاعه = كما يلوع الجول جثل المخاليب
أبيض نحر كن المساعد ذراعه = مضراب مخلابه يفوق المضاريب
كني غريقً بين جمه وقاعه = يبا الطلوع ولا حصل له مقاضيب
لولاي اوسع خاطري بالقناعه = وأدله ليا عديت روس المراقيب
براس الطويل اللي سمك ارتفاعه = أدله وعني يبردن اللواهيب
يابن جهيم شان سوق البضاعه = بارت وانا محتاج حاجة معازيب
بارت وانا محتاج دون الطماعه = ياليت راس المال ما من مكاسيب
وانته حكيم ومن خيار الجماعه = من جاك ما يشناك يامنقع الطيب
فيك الحموه والكرم والشجاعه = وأضن مابك غير ذولي عذاريب
عندي ولا ليه وراها شفاعه = والناس مالي من وراهم مطاليب
مبر اتوسع بالتماثيل ساعه = ورزقي على اللي بالدجا يرزق الذيب
ماني بمن يقصر عن الجم باعه = ليا وردو عدٍ طويل المجاذيب
اخذ حساب رشاي قبل انقطاعه = ماني من اللي يشربون المغاريب
واليا اعترض ربعي خطاة اللعاعه = العب ليا بانوا حضوف اللواعيب
أنا وأنا ابو حمود ماني زعاعه = ولاني على ربعي قريب محاظيب
العب مع الجاهل بعطف ووراعه = والعاقل أفي له بكل المواجيب
من حال ولا حال في انجضاعه = ما تصفي الدنيا بليا غثاريب