الله يعين اللي بوقته تعوق
ماجاته الدنيا على مايريدي
انا الذي ملهوف وقلبي تشوق
والهم من فرقى الحبايب يزيدي
مثل السجين اللي بسجنه مطوق
من دونه الحراس وبالرجل قيدي
على الذي لاشفت زوله اروق
لوفات عيد الناس كني بعيدي
غرون على كل الصبايا تفوق
حتى القمر من شوفته مستفيدي
بنت الشرف ماغازلوها الملوق
والراس عن فعل الدنايا عنيدي
ماهي على شان الرذيله تسوق
مصيونةٍ ماهي تحب المريدي
هذي وصايفها وانا القلب توق
ومن شانها نظمت جزل القصيدي
نجم حرب
نايف عبدالله السليمي