تدرون منهو في عدوي خدعني
حسن النوايا بعض الاحيان خداع
وتدرون منهو في صديقي نفعني
وقت الشدايد بعض الاحيان نفاع
وتدرون منهو فوق خدي صفعني
الحظ لاخانك على الخد صفاع
وتدرون منهو لاصنعته صنعني
جزل المعاني للطواريق صناع
وتدرون منهو لازهمته سمعني
هاجوس فكري لازهمناه سماع
وتدرون ويش ان ماقطعته قطعني
الوقت قالوا كنه السيف قطاع
وتدرون منهو بالمحبه شلعني
الزين لقلوب العشاشيق شلاع
وتدرون منهو في غرامه جمعني
هذاك غرون حبنا له بالاجماع
وتدرون كلمة حب هي ويش تعني
تعني قلبي اللي من الحب منلاع
وتدرون عن الصدق يومه تبعني
لاني على درب المواثيق تباع
وتدرون منهو دون خلي منعني
حكم القدر من دونه اليوم مناع
وتدرون حظي ليه ماهو رفعني
لان الزمن ماهو على طول رفاع
نجم حرب
نايف عبدالله السليمي