أثر الهوى واجب تجي في مراميه = حتى ولو حاولت عنه تدرًا
يسحرك موجه لين توصل لشاطيه = غوص البحر ياللي تبي منه درا
واللي سمع لاهل الهوى عاف مافيه = يصبح يدور له على الارض جرا
شعر الغزل ماكان ودي اغنيه = خوفي يزيد القلب لوعه وحرا
وان بحت مابالقلب وأعلنت خافيه = بان القتيل اللي ذبحني وتبرا
اللي رماني بالهوى كيف ابرميه = هذا الغزال اللي بصيده مضرا
يقبل ويجفل ماعرفنا خطاويه = من الحيا مالت دروبه وفرا
لامن تمايل مال قلبي يوازيه = لولا ظلوعي ظنتي مستقرا
اسعد بشوفه واهتني حين اباريه = عند البقاله كل ماقبل ومرا
نظرة خجل تطفي لهيبي وتكويه = ياجامع الاثنين خيرن وشرا
ناعم بطبعه والحلا زايدن فيه = جسمه نحيل وشايل الصدر برا
اثر القمر لاجا سحابن يغطيه = يشبه حبيبي لاتغطى بغرا
واجمل وصوفه بالوفى دوم نطريه = لامن نشد عني وحالي تسرا
لاغبت عنها تسأل اللي تلاقيه = حبل الهوى كل ما تراخى يجرا
من بد خلق الله بغاني وباغيه = لولا حدود الدين كلن تجرا
لو كان نقدر بالشوارع نحاكيه = مثل العجم ماذقت حامض ومرا
لامن تباطى قمت بالصوت اناديه = جاني بشعره قال كنت اتحرا
حطيت يدي فوق يده تسليه = وفك القميص اللي بزره يزرا
لاكن عدانا العيب والشرع نغليه = سلم العجم طرا علي ماتطرا
هذا حبيبي ياعسى ربي يحميه = دربه على درب الشريعه مضرا
حبن على وضح النقى في مباديه = وسط العيون العاشقه له مقرا
ماهي محبة خبل يقضي مقاضيه = ماذاق من كاس الهوى وزن ذرا
كل مالقى له واحدن باح مافيه = يسمع لطاري الحب قام وتورا
هذي علومي وصامل العلم تاليه = حبي تعدى عن حدود المجرا