مخلد=
حلفت ما اخون الرجال الوفيين= لو صرت ما املك في حياتي سواهم
لا حدني وقتي على المر والشين = لقيتهم ضلعن يذري ذراهم
أرقى سنود ولا احسب للمعادين = وليا ضميت اشرب من عدود ماهم
نسل الرجال اللي تضد السلاطين = وقت الجهل والجور يعرف حماهم
لاجيتهم وهموم فكري ملايين = صدّرت منهم والسعد في حراهم
زماني علمني وقال افتهم زين = بنك الرجال ولا بنوك الدراهم
.=
.=
ابو طلق=
وانا معك ياعزوتي حالف يمين = ياللي على العليا مشيّد بناهم
حنا سند لك ياسفير الشجيعين = ربعك غطا لك مثل مانته غطاهم
إرقى سنود .. وتك ..واشرب فناجين = مادونك ألاّ رجال تفدى دماهم
لك ولنا في صفحة المجد تدوين = حروب والتاريخ يثبت نباهم
يامرحبا لا جيتهم تبهج العين = وابشر بصدرن مايضيق بسلاهم
ربعك ماتشري صحبة الطيب بالدين = وانته في بنك الطيب اكبر مساهم