الدرهمه والدرعمه بينهن فرق=يلي تحسب ان العرب ما تفرق
الوافيه بنظارنا ماتجي درق=يلي جنوبك عن جنوبك مشرق
لب العوارف حد عرفك معه قرق=هذا مقامك بنظري لاتبرق
مانته براقي فوق لو قيل لك ارق=لنك با الارض ومحتواها مطرق
ماتنطفي جمرتك يا لايع الورق=لو انت بين اغصان سدرك تمرق
الرفرفه ما خلصة قبلك البِرق=اقصى جداها الخومره واتفرق
والصوت ماجدا اللي يلعلع من البَرق=والراس مايذريه كثر التدرق
ومن لا حفض قدر المهابه عن الخرق=يلقاه عبرود الرصاص المخرق
ماني من اللي يسرقون النظر سرق=لابو وجيهن تنكسح ما تعرق
بعض الكبود اطيب لها تحترق حرق=والدمع مجدا اللي من الدمع غرق