ماجور ياقلبن به الحزن حراق=حزنن تعمق بالضماير وناشه
يامل قلبن كل ما لاح براق=مثل غليثن زايد البرق داشه
اللي تجمع به من أشكال وأرناق=سيلن على الضفه تجمع قشاشه
صدمة وراء صدمة من الحزن مافاق=أمواج حزنن لاتناثر طشاشه
الى تذكر مامضى له بالاوفاق=هلت به العبره على يوم عاشه
سوالفن ماهي لعاشق وعشاق=سوالف اللي قاسي الوقت حاشه
نصبر ونجرع علقم الصبر ترياق=أمره صعيبن لو فتحنا نقاشه
والليل لو طول تقفاه الاشراق=والجو يصفو لو تكاثر غطاشه
والصبر جبر وللمخاليق خلاق=يسقي قلوبن لاتزايد عطاشه
ترا الفرج للعبد بالصبر ينساق=مثل المطر اللي غشانا رشاشه