قامت صواديف الزمن تاطانـــي= وأسترسلن عقب البطا قيفــــــانـــي
حييت يالهجس الصدوق الراهي = يالي حضورك يقلب الأوزانــــــــي
طوّل غيابك وأستضاق الخاطر=من شهر عشره مبعد الأوطـــاني
واليوم جيت وجيتك محســـوبـه = ضيف ٍ عزيزأو واجبه ينخــــانـي
والله لاذبح لك بنــات أفكــــاري = وأصب لك من دلة الأشجــــانــي
لين أكرمك وأعطيك كل أحقوقـك= حقن علي أوجّب الضيفانـــــي
قال المثل أكرم كريم وتربح = وإلاالردي من يكرمه خسراني
وأنته كريم وطيبتك ملمــوســــه =لاشان وقتي والزمان أشقانــي
تاقف معي وقفة صديقن صادق = وأدلـــه معك ياعمدة الصدقــاني
وأطلق خيالي بالفضا ويروده =وأقوم أكوسر بالقصيد الحانـــــي
وأنظم ابيوته مثل نظم السبحـــه = يالين تظهر خفته بالســـــانــــي
والبسه أصفى الحلي من الذهــب=حتى يرجّح كفــــــة الميزانـــي
ثم أبتدي وأطلق سراح حروفــه = وتعود معها سرحة السرحانــــــي
قولن جزيل وسامعه يطــربلــــه = ويثني عليه السامــع الحقــانــي
وإلا الغبي ماهمنـــي لو ذمـــه =عمر الذكا ماناسب الغبيانـــي
ماهو غرور وغطرسه ياربعي = إلا كلام ٍ يدعمـــــــه برهانـــي
انا بسيط بمنهجي وأسلوبــــي=ويغلب علي الطابع العقـــــلانـــي
تحكمني أعرافي وسلم جدودي = الي عليهـــا والدي ربـــــانــي
الدين والفزعــه وبعد النظــره = وذبح السمين من الغنم للعانــي
والباس والطيبه ولطف الجانب = والجيره الحسنه مع الجيرانـــي
ودعم التواضع والتواضع مكسب = والي يحصل جانبه كسبــــانـــي
والحمدلله يـــــوم ربــــي حطـــه=منهج يثبت بالخفوق أيمـــــانـــي
ما أشوف نفسي لاظهرت بميزه = حافظ حقوق الجانب الأنسانــي
ومع مالقيته من مديح بشعــــري = ماقلت يالله يالغرور أنحـــانـي
شاعر أديب ونظرتـي رافعهـــا = ولايمكن أني التفت للدانـــــي
حتى قصيدي لابغيت أقولـــــه = ماخصصه في قايد الغـزلانــي
أعرض عليه أوضاعنا بالمجتمع =واليا عرضت أوضاعنـا حياني
وأقلط وأخذلي بالمشاكل وقفـــــه = وأطرح حلول المشكله بأحساني
يثيرني فعل الخطـــا ياعالـــــم = بالـــــذات لاصار الخطا بالعانــــي
وأكبــر خطا إن العرب ماتخجل = تلقى الجميل وتعقبه نكــــرانـــــي !
لين أنتشـــــر بين العرب حســاده = صف الحسد وأفترقت العربانـي!
هــذاك يبغى ينتقص من هـــــذا = لين أكتسب من نيته نقصانــــي !
وأفلان مايقدر يعــد الواقـــــــع = إلا ليا يعــــد الصحيح أفــــلانـي!
وحتى المواهب ينحسد راعيهـا= لو المواهب وهبة الرحمـــــانـي !
وشلون نبغى نرتقـي للقمه = وحنــا ندور عثرة الفرســــانــي ؟!
والراعي الي مايشكل قوه = نعطيه سرج وندعمه بأحصــــانــي !
ويروح وحزامه ملي وكامل= ويرجع احزامه بالفشق مليــــانــي !
واليا نشدت أصحابنا عن وضعه= قالو شجيع ويرهب الشجعانــي !
أثر الزمن هذا زمان أمغاير = وانا أحسبه كـ ماضي الأزماني !
فيه البشر تلقط عيوب الشاطر= ولاتمتلك عن زلته كتمــــانــــي !
تركي عليه من العتب وتعاتب = وترمي عليه من الجهل جحداني !
أما البليد تجامــــلــه باأخطائه= لو هو على طول الزمن غلطاني !
وأنا وقعت أمع الضمير بموقف = اليا رضى زعلت علي أخوانـــي !
واليا زعل لايمكن إنه يرضــا = لاما غديت بموقفي حيرانــــــــي !
الله وأكبر يالزمان وجـــــوره = كم أشتكى من وطيته شيخــــــاني؟!
اليوم يظهر لك بسنن ضاحك = وبكره تشوفه عاقد الحجــــــانــــــي !
ربطت جوره بالحديث السابق = من بعد ماشفت الصريح يعــــاني
من ينفرد في نظرته مايسلــم = أمــن الزعل ومعاتب الشرهـــانــي
هذا نظام ٍ جــالنــا من تالــــي= وأنا غــديت بمـوجبــه بلشـــانـــــي
ويالله تستر مــن نظـــام ٍ قــادم= يمكن يصيب أهل الوفا حرمـــــاني
حنا بزمان العولمه والفتنــــــه = نرجع ورى ونقفل البيبـــــانــــــي !
نبغى التطور والتطور ضايع = كلٍ على بث الفضا شفقـــــانــــي
مير النتيجه ماتسر الناظـــــر = هز وطرب مع عاصي الحــــلاني
وأوادمٍ منهــــا الحيا متبــري = تشوفها في ســــاحــــــة الدكـــاني
هذا يغومض للفتـــاه بعينـــــه = وهذيك تبغى تزحم الفتيـــــانـــــي
حثت عليها العولمه وأستابت = تضحك وتتبع سيرة النصــــرانـــي
دنيا عجيبه جيلها متعاكــس = غادي من أسباب الفضا خربــــــأني
قام الولد يلبس لباس الأنثــى = وأم الضفاير شالت الغطيــــــانــــي
تميل للبس الكريــــه الضيق = لو كان يظهر جسمها عريــــــانـــــي
وأبو شنب شال الشنب وأستمرد = وأدرج حنوكــه للملا بألبــــــانــــي
وقتٍ غريب ومنهــجٍ متناقض= عسى الولي من موجته يحمـــانــــي
ويقلب توجه جيلنــا للأفضـــل = ويرسل عليه من الحيا هتـــــــانــــي