خبري بكم يا اهل الحكا ماهو اليوم=خبري بكم مبطي بكم خاب ضني
بعتو ثمين اصدوركم برخص السوم=ارخص من اللي قيمته حكم صني
واللقمه اللي مالها قبل بلعوم=قامت تمناها الحناجر تمني
الكل منكم كنه الحوت لاهوم=يشتالها لو جاوز الوزن طني
وطيبكم اللي مسهمه جملة ارقوم=برقامها عنده خبيرن و فني
خبرة خبير وقدمه الدرب مرسوم=يمشي وقلبه يا ملا مرجهني
والليل مضلم والسماء مابه نجوم=عنه النجوم المرقبات ادبحني
وخيم دجا ليلن به الحق مهضوم=دام اهل الذمه اذممهم غدني
صدو صدود وغمضو مابهم نوم=كلن يجوز يقن للحق قني
دام اهل الصدات با المجتمع كوم=أمؤشرات العارفه با التدني
قامت تدنا اعزوم وتهبط اعزوم=وعزم العزوم الهابطه ما يكني
با الملحمه سيفه مشبب و ملحوم=مسنون سنه تالي الوقت سني
سيفن خذاه الاش في سعر قدوم=يوم ارخصه راع الظروف اجبرني
ازرا وكضمله على شوك برشوم=لا يقدر يسولف ولاهو مغني
والموقف اللي يفرق الحر والبوم=ويكشف رصيد اهل الرصيد الهبني
صحيح وقت الازمه تظهر اعلوم=اصبح وجه والا اصبح الوجه بني
واللي بصدره علم عالم ومكتوم =العلم يضهر والخفايا خفني
ينام قلبن مابه احساس معدوم=فديغ قلب في حياته امرني
مع العزايم والهمم غلبت الروم=ولاكل حربن للغنايم اتشني
وطهر بلد في حكم آل سعود محكوم=والدار بضلال السعود اطمئني
ومساندتهم فرض واجب ومحتوم=حق الوطن مافيه مني ومني
ابذل سبب ثم قل مقدر ومقسوم=والا ترا الاهمال قسم التجني
والوقت هذا حرب وعلام ونجوم=وقصى طموحات العرب يا عنني