هات القلم قدام لايسـري الليـل=هات القلم هاتـه وعجـل عليـه
بكتب وبرسل لي حروف ومراسيل=لعـل ماتكتـب عليهـا خطـيـه
لإبن عتيق اللي يحـب التعاليـل=عبدالله اللي كـل راسـه حميـه
حربي ومن نسل الرجال المشاكيل=اهل الوجيـه الغانمـه والوفيـه
تاجر ومتعود لكسب المحاصيـل=يكسب براس المال ميـه بميـه
مبعدعن الرديان والقـال والقيـل=واهل الطرب والعود والسمسميـه
متعودً دايـم لشـرب الفناجيـل=كيفـه مـن البـراد والشاذليـه
فارس ومن ركابت الجيش والخيل=وانا بعد مثله عزومـي قويـه
مرتاح بالي لين اشوف المداهيـل=واذكر زمانن فيه روحـه وجيـه
يوم القمر يبرى له الجدي وسهيل=يقفي وانا مابيـن هـاذي وذيـه
ماهمني عبيـد سمـح المقابيـل=راع العيون اللي تجيـب المنيـه
روح ولاهي عادته بـارد الحيـل=ايديه كانـت ماتفـارق يـديـه
مغير ادلـه خاطـري بالمواويـل=لاعاد لـه عنـدي ولاعـاد ليـه
من سبته عيني تهـل الهماليـل=كيه يمين القلـب ويسـار كيـه
ياصاحبي ذقت العنى والغرابيـل=الحب بلـوى والمشاعـر نديـه
هذ الكلام وعادتـه بـارد الحيـل=يجازي الحسنه بعشريـن سيـه

قريت خطـك يـا جزيـل التماثيـل=يامرحبـا حييـت والنـار حـيـه
ياشاعرن ما فـي كلامـك مداخيـل=شرواك بيـن النـاس لـه قابليـه
غالي على اسمك با الغلا ماش تاويل=من لابتن با المجـد ماهـي خفيـه
اللي مثل شـرواك يستاهـل الهيـل=والعـود الازرق والشحـم مقدريـه
قدر الكرام اللي علـى غيـر تبديـل=سلمـن عليـه جدودنـا الاولـيـه
سلـم النشامـا واليالـي مقابـيـل=ولا عندنا في تركـت السلـم نيـه
واللي مثل شرواك كيـف المعاميـل=كيفـه ولا يحتـاج منـي وصيـه
وشكواك تخفاني خفايـا التفاصيـل=لو بان بعض املابسـات القضيـه
تشكي غرام ام الرموش المضاليـل=بسهومها تشقـا العيـون الشقيـه
الجادل اللي تدعج العين بـا الميـل=تجني على بعض النفـوس البريـه
وحب العذارا علت العصـر والجيـل=وراع الهواء كم جـاذب السامريـه
يشكي عذاب ام التـرف والخلاخيـل=من حبهـا قـد هـام باالمهمهيـه
عقب الغـلا ذاق العنـا والبهاذيـل=ومـن الغـرام العـذب للمكرهيـه
وكثرهـن اللـي للخطايـا محابيـل=والثلث منهن بـا الحـراوي نقيـه
وحب الشرف مافيه يا القرم تاجيـل=وترا مهـر بنـت النشامـا عليـه
ابختصر دعـواك مـا ودي اطيـل=وختامهـا منـي سـلام وتحـيـه