حفيد الحجيري=
مرحبا من هاجساً يتعب على شان الجزيله=والجزيله من تعب من شانها نال الجزالـي
العميل اللي يسدّ الباب لا نادى عميلـه=لا يعوّد بعد جاله مع هل الجزلـه مجالـي
محمد العمري=
البقا يا شاعراً تحرص على كسب الجميله=وانت مذكوراً بفعل الطيب غالي ثم غالي
ياعميل الخير جيب العلم و الطرقه طويله=والدروب مقضيه وذيب يرقى كل عالـي
حفيد الحجيري =
الوفا من طبعكم يأهل الوفا و أهل الأصيله=ما يجي منكم قصور و مدكم مد الرجالي
البلا يا صاحبي ناساً على الساحه دخيله=ما تميّز فالمواقـف فالمعانـي مـا تبالـي
محمد العمري =
البلا ماهي دخيله البلا ناسـاً عليلـه=زود الوحده على ثنتين يا الله بالكمالي
كل واحد ياطويل العمر حمله مايشيله=بس يبغاها لجاجه مثل مايلج الهبالي
حفيد الحجيري =
العليل اِله الدوا والنار في خشـم الفتيلـه=والعصا للي يدورّها يا وجه الخيـر فالـي
كان ما يشتال حمله ، ليش ظهره يرتكيله=لا يطب السوق حتى يصرف جنيه و ريالي
محمد العمري =
يبدي أنك عارف الرجال ومخيل مخيله=مير قلي وين يسكن غربها ولا شمالي
كل واحد حسب عرفه ياولد رئيس قبيله=مايهمه مايهمـه قولنـا وراس خالـي
حفيد الحجيري =
ليتهم واحد ياواحد كان دورّنـا كفيلـه=البـلا متنثريـن ونجمهـم تالـي يلالـي
وا عنا اللي مالهم بين العرب راس و دليله=تحسبْ العرف يا رجّال بشماغ و عقالي
محمد العمري =
حدد الاسماء وأنا بجيك بسيوفاً صقيلـه=لاتشمت لاشمت و الفرج وسط الليالـي
عان صيفي عان بن جمران خيال الكحيله=مع بن مرزوق عانه محتزم يبغى القتالي
حفيد الحجيري=
لا غنى عن حرب ربعي فالخفيفه و الثقيله=عزوتي وان جات للميدان ما فيها جدالـي
اختصار القول بأوجزلك كثيره في قليلـه=بالفكر والقاف نعدل كل من فالدرب مالي