ذابت مشاريه الغلا وسط الاعماق = واستيسر الحزن الخفي كل معلوق
والعبره اللي تحترق بين الاحداق = ماضنها ترخص على كل مخلوق
ماترخص إلا للذي حبهم فاق = دم العروق بعالمٍ كله عقوق
من بعدهم مني خذا الحزن ميثاق = ما تنزل العبره على فقد معشوق
واليوم لا تاقف ولاهيب تنساق = تسرح وتضوي بين الاعماق والموق
ما ودي اذرفها على وجه الاطلاق = لو قيل لى من همها منت معتوق
ولولاي اترجمها على بيض الاوراق = ما صار لي في غيهب اليم دانوق
دانوق يجذب لي طويلات الاعناق = لعلي القى بينهن شيٍ يلوق
شيٍ يلوق بذوق عالين الاذواق = ويضيف لاهل الذوق ذوقٍ على ذوق
تعبير من قلبه شفوقٍ و مشتاق = ومنزهٍ عن ملة الغدر والبوق
في عالمٍ ماضاع به غير الاخلاق = وتموت فيه حقوق وحقوق وحقوق
واللي لبس نوط الوفى خاطره ضاق = كن الوفى في عالم اليوم ممحوق
كونٍ غزاه الكذب من كل الافاق = واسكت بصوت المصلحه كل منطوق
واخر عزاي يعوضني بعض الارفاق = وإن خاب بعض الظن شحت النظر فوق
ودعيت ربٍ للمخاليق رزاق = يجعلي بأمره كل مطرود ملحوق