سالم البشري=
الله ياليتـنـي رسّـــام = وارسم مشاعـر تلازمنـي
والخوف يوم امسك المرسام = صعوبة الوصف تهزمنـي
ماجد ابومديده =
إنته رسمت الهوى بإحكام = وتقول في شـي يحكمنـي
لاتطري الخوف والأحـلام = ومن وصفك العذب تحرمني
سالم البشري=
أحيانـاً المـرء مايـنـلام = وانته بعـد جيـت علمنـي
بوحي تجاوز مدى الأقـلام = وصمتي على الوضع يآلمني
ماجد ابومديده=
عزيز ماآرضى عليك ألآلآم = لكِّن عن الوضع فهِمْنـي
لأنـهـا دورة الأيـــام = لاحطمّتـكُـم تحطّمْـنـي
سالم البشري=
مااستغرب الطيب فالمقدام = فالمر والحلـو قاسمنـي
لكن وسط العلوم اعـلام = لااخفيتها منـت لايمنـي
ماجد ابومديده=
إنته على الصمت ماتنلام = لكِـن قضيتـك تلزمنـي
ولو بالإشاره تجيك أحكام = أشِّـر وللعِلـم سلِّمنـي
سالم البشري=
لاجل الوفا ماشكيت ازيام = داريت والطيب زايمنـي
حتى بدا للفؤاد اخصـام = خوفي مع الوقت ترغمني
ماجد ابومديده=
مهما يزيد الزحام زحـام = فالعزم مِثلـك معلِّمنـي
إرغِم خصوم الفؤاد إرغام = وإن خانك الوقت كلمنّـي
الحق ماينكِّـس الأعـلام = ياللي مِن أجلُه محكِّمنـي
أنا أردع الجاير الظّـلام = فورآ ليا قِلـت ظالمنـي