اللي فقد له غالي ٍ من غواليه =يصبر على فقده وطول انتظاره
ولو ان ما صابه يبيح خوافيه=ماهيب لا كيفه ولا من قراره
والدمعه اللي تنحدر من طواريه=ماهي كثيره فيه ولاهي خساره
والعشق بلوى والعواشيق تتليه=ينزع من الرجل الوقور الوقاره
والمترف اللي زايد ٍ في تغليه=يحطب ضلوع الصدر ويشب ناره
ياليت يعطيني مثل مااني اعطيه=وابني ويبني لي بقلبه عماره
واكتب عباره فيه لو كان ترضيه=كلمة احبك بإختصار العباره
من راح من كيفه عسى الله يهنيه=والحب ماهو غصب ولا جباره
عشق ٍ يجيب الذل مالي غرض فيه=من ياكل الحنظل يذوق المراره
واللي لعب بالحب لعبه تسليه=ينهار بكره مثل برج التجاره
واللي يصون الحب لازم نحييه=ونكرر التقدير تاره وتاره
وكل ٍ له بدنياه عشق ٍ يغذيه=مبني على ساس الشرف والطهاره
وان كان صادف به عتاب ومشاريه=واجب على المخطي يجيب اعتذاره
والوافي اللي يحترم قلب مغليه=يحرص عليه ولا يزيد انهياره
مره تعلى بك ومره تعلّيه=وحضارة التفكير هي الحضاره
وان دام حب الشخص واللي مخاويه=دليل في صدقه وحسن اختياره
واللي يحب وما حصل حب يرجيه=يبعد لو ان البعد فيه احتضاره