ألا ياهـل العيـرات كيرانهـن والـدرب=علـى نجـد سجـو فوقهنـه مـن القبلـه
على ضمر حم المناكـب بنـات العـرب=وابوهـن قميـران المسمـى وتنسـب لـه
حراير هذيل أهل النضاء والقضاء والحرب=إلـى مـن دخـان المعـارك نثـر وبلـه
قطام الفخوذ منسعـات الـوروك وسـرب=عجار الكراسـع طلـق الايـدي ومسبلـه
من العشب كارب شامخ الني فيهن كـرب=رعت في صفار عقيربانـه وفـي ربلـه
زهتها السفايف والميارك وشغـل ذرب ,=وعصبان غـزلان الأشـدة تعصـب لـه
دماث القطي هكب المرادف خفـاف ودرب=تهوجل على صوت المحدي وتطـرب لـه
عطوا شرق نخله والمحاني ومروا ثـرب=وداورد والصفـراء وحسيـان والعبـلـه
وردوا على ديار المعزة بهن مـن قـرب=علـى دار رجـل زاد مـع طيبتـه نبلـه
على فايز الموسى القطامي مورخ حـرب=هجوس المعالق من ضميري تقانـب لـه
أهل ماقـف بيـن القبايـل عزيـز وذرب=بيوت الصخاء لطمـة عـدو تزهـب لـه
وعسى صاحبي تفداه قوم الحلوق الجـرب=هل الماكر اللي كـل بـوم يتجـاذب لـه
هواهم تجاميع الحكـي والأكـل والشـرب=والأنظـار منتكسـه والافكـار منعبـلـه
ليا جيت تجمع جاب قسمة وراحت ضرب=خسارة خزايز مجد الابطـال يكتـب لـه
ونبا منك راي في حلوله يقـص الـدرب=يرد النكيـف مـن اليمامـة إلـى القبلـه

بدينـا بذكـر مفـرج الهـم عقـب الكـرب=فـلارب مـن بعـده ولارب مــن قبـلـه
هلا بالركـاب اللـي تبـارن مثـل السـرب=من هذيل جت من معـدن المجـد واصطبلـه
أهل ماضي يشهـد عليـه العجـم والعـرب=واهل حاضـر كـل الاجاويـد تحسـب لـه
زمان مضى يوم الطوابيـر تسـرب سـرب=وبيرق هذيـل بساحـة المجـد يضـرب لـه
سلامي لكـم ياهذيـل مـن شرقهـا للغـرب=عـدد مانشـى مـزن وماهـل مـن وبـلـه
لصالح دخيل الله نـرد الثنـاء عـن حـرب=كما قال بن حثلين من طـاب لـك طـب لـه
نرد الثنـاء مـن خاطـر للمعانـي طـرب=عميل الوفـاء نشـري قبالـه ونطـرب لـه
وأبا اعطيك موجز عن تقارير جيش الصرب=كبـار الجسـوم الفارغـه فرغـة الطبـلـه
هل السود والمنقـود واهـل الخنـا والـزرب=خطـاة البليـد اللـي علـى غاربـه حبـلـه
إلى شفت زوله قلـت حاتـم ومعـدي كـرب=والا اوحيت نطقـه قلـت خبـل ولـد خبلـه
شجاع علـى ربعـه إلـى قـام ينفـخ ذرب=سميـعٍ مطيـعٍ فـي هـوى لابـس الدبلـه
وفداك الذي في عرض الاجواد يضرب ضرب=إلى ماكسـب غـرات الاجـواد تكسـب لـه
يتلـه عميـل السـوء تـل الرشـاء للغـرب=هوى النفس يركض له وابو عين يشعـب لـه
وفداك الذي عايـش حياتـه معيشـة خـرب=شقـاه برخـاه وطـامـنٍ للـوطـا شبـلـه
يحسب الرجوله بيـن زل ومكيـف شـارب=علـى ناعـم المركـا وزاده يـقـرب لــه
عسـى واحـد ماهـام درب العـلا للتـرب=عسى النذل فـي كـل المجالـس يتـرب لـه
عـدو الرفاقـه والقرابـه صديـق الغـرب=قليـل التعـب للخيـر والشـر يتعـب لــه
إلـى مـن بليـت بقربهـم بايعيـن القـرب=عليك الصبر والصابـر الفـوز يكتـب لـه