غازي =
رحال عندي لك استفهام = بعد التحية وفالك زين
ليه الذي يقصد الدمام = لازم يسافر على البحرين؟
الرحال =
خابرك من خيرة الفهام = وعندك ياغازي نظر بالعين
كيف اشرح العلم للعلام = وافتي وفي الدايرة مفتين
غازي =
لازال ذاك السؤال الهام = مطروح ياسيد الغالين
عطني جوابك بدون ارغام = غيرك عن الرد مقروعين
الرحال =
مافيك حيلة مدى الأيام = ياعندليب المثل لاوين
من حج يسعى عليه الزام = وهذا ركن من شروط الدين
غازي =
الحج وصّا به الاسلام = في العام مرة على الساعين
والجسر مفتوح طول العام = يامبعد الفرق بين وبين
هات الاجابة بوجهٍ تام = لاتردني بين جيم وسين
ايش الذي في المنامة هام = يجعل لها الكل متجهين
الرحال =
لاشك قولك على مايرام = ماعارضه وانكره وادين
الجسر من يوم صار وقام = ضافي جماله على الشطين
أما المنامة بلد حكام = وعاصمة تسكن النهرين
فالواقع تعيش والأحلام = تعال شاهد معي يومين