الاولة التقوى من اتجاه باريك = خلك على التقوى حسين الفعالي
وعواقب التقوى تراها تهنيك = رجل بلا تقوى قصير الحبالي
والثانية الابوان عسى الرب يهديك = لبي طلبهم فيك حطو الامالي
اصبروا على المرات عسى الله يخليك = كم ارخصوفيكم عزيز الغوالي
والثالثة اخوانك يافيصل اوصيك = لموا بعضكم في صفوف الرجالي
والرابعة خيتك ترى هي تغليك = خلك عليها هيف مثل الظلالي
والخامسة اولاد جدك ربعك واهاليك = في ال النويمي لاتوري هزالي
لو ضاق واحدهم مايهون يشنيك = تاخذهم الغيرات عند التوالي
واوصيك بالقربى واللي مواليك = بوصل الرحم وصاك رب الجلالي
والسادسة مالك ترى المال يعطيك = دنيا ودينا على كل حالي
والسابعة ظيفك اذا جاك ناصيك = كثر له الترحاب مع القبالي
قدم له الموجود من غير يحفيك = وحسن له الاخلاق مع التهالي
ولا تحتقر مخلوق ماطالت اياديك = كرم محلك دون فرق الرجالي
والثامنة السفهان جنب تماشيك = من عاشر السفهان فيه الخمالي
خلك مع العقال زينة مساعيك = اللي يثيبك في صعوب المقالي
واعرف صديقك من اللي معاديك = لاتغرك الضحكات ياشف بالي
والتاسعة الحلم خله يباريك = بالحلم ترقى عاليات الجبالي
و الطيب اجزيه باحسن مايجازيك = واصفح عن اللي ضعيف المنالي
والعاشرة صلي علي خير هاديك = محمد رسول الله رب الجلالي
عد وبل المطر وماسال واديك = وعد نجما في سماها يلالي