سلوم الاجداد
بديت باللي كلنا نلتجي له = اللي له أهل الدين ركع وسجاد
هو الذي ينشي سحاب المخيله = والمزن يجعل فيه بارق ورعاد
ينوض براقه ويشعل شعيله = ويهل هماله على جبال ووهاد
يسقي الديار الميتات المحيله = وتخضّر الأرض وطيب العشب ينقاد
يا ماحلا وان كان رحنا تعليله= مع صفوة من خيرة الربع ياعماد
ويا ما حلا وان شبت النار ليله = وجمر الغضاء فيها يتوقد توقاد
ومد الفراش بوسط نبت الخميله =والدلتين وجنبهن حط براد
الكيف نطرب فيه بنّه وهيله = كيف يقلط للرجاجيل بقناد
مصلحينه كاسبين الفضيله = ومنقدينه قبل يأتيه نقاد
واذا رجعنا بالبيوت الظليله = جمع الجماعة يسعد (ن)قلبي إسعاد
قالوا علامك تعتزي بالقبيله = الجاهلية انتهت يابن الاجواد
قلت الجهل باللي مضيع دليله = اللي يبينا نترك سلوم الأجداد
وشلون ننسى كاسبين النفيله = اللي لهم تاريخ حافل بالأمجاد
تاريخهم يشهد بفعل الجميله = وعلومهم يطرب لها كل نشاد
صدق وشجاعة والعلوم الجزيله = وبيوتهم للضيف صادر و وراد
اللي يرون السيوف الصقيله = في ساعة فيها أشقر الدم يزداد
واليوم جاء وقت علينا حفيله = جتنا ثقافة غرب مليانة أحقاد
تبي تغير ها لخصال الاصيله = اللي كسبناها من رجال اجياد
حرية فيها استراح الهبيله = وإلا الرجال العاقلة همها زاد
حرية تدعو لفعل الرذيله = وتحارب أهل الدين ورجال الإرشاد
الشاعر : عبد المطلوب مبارك البد راني