المشاركة الأصلية كتبت بواسطة نبض الوجود

نبض الوجود=
سلام وانته من اللي يقدرون السلام=ويعرفون الصوايب وين هي واقعه
ابغى معك وقت لو تسمح بقولك كلام =وبشكيلك جروح في جوف الحشا طابعه
قابل البشري=
شعشع و نوره تجلى مثل بدر التمام=ترحيب صفحة حروفه بالوفا ناصعة
وانا معك من جروحك ماهنالي منام= لكن قلي منين اسبابها نابعة
نبض الوجود=
انا غزتني على غفله سهام الغرام =وشكت فؤادي وصارت بالقفا طالعة
اعيش كني فقيدة في دروب الظلام =ان جيت خطوة امام الثانيه راجعة
قابل البشري=
الود يبغى مجازف مايهاب الصدام=واسمى مباديه فيها الشك ما نازعه
والياس لاطب قلبك صار حبك حطام= من فاجعه ينتهي ويطب في فاجعة
نبض الوجود=
مباني الود في قلبي عليها السلام =الروح متشتته وامالها ضايعه
بنيتها بالوفا والود حسب النظام =عليتها للسماء الاّ وهي واقعه
قابل البشري=
ساس المودة من اول شي ماهو تمام=لوكان راسخ بروجه فالسما فارعه
وان كان تبغى النصيحة كف دمع الملام =مادام حلم الموده تاه في واقعه
نبض الوجود=
بنيته الساس متجهد بكل اهتمام =ابني واعاصر ظروف الوقت واصارعه
اللي عطيته هواي اخلف معي في الختام =ضيّع تعب مابنيت اسنين متتابعه
قابل البشري=
لاتلتفت خلف وارسل نظرتك للامام =وامسح باناملك مزنة حزنك الدامعة
وان كان تبغى بداله فيه قايم مقام=مخلص يحبك ونفسه للهوى طايعه
نبض الوجود=
لوكان قلبي بيدي قلت هاته قوام =باستبدل اللي غدربي يوم واقاطعه
لكن قلبي على باقي عضاي الإمام =يحكم وانا للامام انساق له خاضعه
قابل البشري=
لاتنتظر في وجود اللي وجوده عدام= وانظر لشمس الامل من فجرها طالعه
ولا تخلط اللي مباح وحل باللي حرام=الضاره ضاره والنافعه نافعه
نبض الوجود=
وجهت بالهرج حولي اصبع الاتهام =وانا صريحة معاك ولاني مخادعه
ومايتبع المخزيه من خاف ربه وصام = وانا على الدين والسنه لها تابعه
قابل البشري=
الخشم ماضر زينه لويطيح الزمام = ياوردة الشعر ياللي فالفضا يانعه
وياللي تصوم وتصلي كمل الالتزام= واللي قرا الحشر يقرا سورة القارعة
نبض الوجود=
انا كذا ماشيه بالذوق والاحترام =وماهمني لو رأيت ذيابها الجايعه
والحرف لاعاد راقي في العلا مايضام =ولاني من اللي تتابع هرجة الشايعه
قابل البشري=
وانا مودب ولا اخطي فاهمة يامدام=ولا ارميك بالسوء وانت فالسما ساطعه
والرد هذا اخيره جاك مسك الختام=يابنت الاجواد ياللي نارها والعة