سلام تسليمة وفا مني لها لحيه وشـارب=وسط صف الملعبة تمشي وتفتل في شنبها
من بنات الفكر صافي جوها عن كل ذارب =بين طيات الكتب علم البلاغه من كُتبها

مرحبا ترحيبةً ما كِنّها الا سـد مـارب=وسط صف الملعبه لا من بدت محدن غلبها
مثل موج البحر في مده يغربل كل قارب=والرجال أهل العقول الله من الحكمه وهبها

البقا بأهل اللوازم من بعيدين واقـارب=يوم راع الطيبة دايم يحضر في طلبهـا
والمعادن والعقول تصيغها كثر التجارب=ماعرفنا نحاسها لولا التجارب من ذهبها

فاللوازم ما قصرنا جهد ونضدّ المحارب=يوم راع الطيب شب النار ما نطفي لهبها
المعادن كُثر والعربان مستعرب وعارب=والرجال بفعلها لو كان مغنيها نسبهـا