يامنور الغلاب ياطيب الفال=يالشيخ فيك النادره تستويلي
تواردٍ فكري دقيقات وجلال=ورد القطى لاطار بعد المقيلي
اخترت لك مالاق يامعرب الخال=من ماردٍ مادم جمه نثيلي
قلنا بكم يالشيخ من ضمن من قال=ماني وحيد ومن فردبك بقيلي
هرجٍ بلا معنا سماجه وغربال=يصير بين الناس ماله حصيلي
انا مدحت الشيخ شيال الاثقال=حيثه يحب الطيبه والجميلي
دايم محله لرجاجيل مدهال=مابينهم حاسد وراعي نقيلي
على وجار النار مصفوفه ادلال=قذوعهٍ من زين تمر النخيلي
فنجالهٍ ياوي ياوي فنجال=يبري فواد اللي فواده عليلي
ماصك منور باب بيته بالاقفال=راعي كرم شهم وشجاع ونبيلي
للضيف مايذبح رديات وهزال=مع النبا الطيب له اتجاب حيلي
فوق الكرم والعرف عنده سعت بال=والجار يسمح زلته لو يعيلي
مقدام للحصنان ماضين الافعال=حرز الذليل مزبنين الدخيلي
نعمٍ بهم رجال رجال رجال=نقولها والله علينا وكيلي
المدح لاجاله مجالٍ للابطال=ميغط نور الناس غير الهبيلي
افعالهم تضرب بها عصم الامثال=لاخير في هرجٍ ضعيف الدليلي
غير المشيد يوم للخيل خيال=ياما خذوها فوق جيشٍ وخيلي
ومنهم سبيل اللي خصم عايلٍ عال=بعد السطر خلاه يرجع ذليلي
الله يبيحه يوم نجزى بلاعمال=يوم الحساب ويوم كشف الحصيلي
ماهمته نفسه ولاهمه اعيال= والكل يدري من هذاك القبيلي
خال العيال اللي لهم مجد مازال=حقايقٍ ماهي هرابيد ليلي
من دون حرب ارخص حياته ومانال=مواقفه جيلٍ حكاها لجيلي
عسى الخيال اللي به البرق شعال=يسقيك ياقبرٍ سكن به سبيلي
ستين ليله فوقه المزن همال= لاما النفل من فوق قبره يميلي
ماقلتها نبغى مدايح والا مال= مالي هدف يذكر كثير وقليلي
حربي وحر الراي في كل الاحوال=ماني بمدح اهل الشجاعه بخيلي