المشاركة الأصلية كتبت بواسطة سآمي الوسيدي

ياسعود لامن ضاق صدرك من الناس=لايضيـق إلا مـن رفيـقٍ شريتـه
تشريه بالخـوه وطيـبٍ ونومـاس=ثم يخلـف الهقـوه علـى ماهقيتـه
حنا تربينـا علـى رفعـة الـراس=ونذود دون الجـار واطنـاب بيتـه
ما حاشنا حوش الردي شين الأجناس=تشوف فـي وجهـه نكـد لا رأيتـه
يغريك بالضحكه وضحكه لك افـلاس=ولاشال همك يوم حالك بريته
لاطيب خلق ولا رجوله ولا احسـاس=لاوسع بال وقبح الله صيته
ولاتنفعل وتطيح في صدمـة اليـاس=إنسـه مثـل أغلـى فقيـدٍ نسيتـه
وأغنم بخوة من ورث طيبة السـاس=ياقف معك بالضيـق لامـن نصيتـه
ماورد الصاحب على درب الأتعـاس=يعجبك بالفزعه ولـو مـا احتميتـه
هذاك فزعاته كمـا ضربـة الفـاس=عكس الردي ماينفعـك لـو نخيتـه
ماتجدي الشرهه على قـول بـلاس=الـي يضـد العيـب لامـن نهيتـه
لو صرخه أبو ادباس ردت له ادباس=ماقـال ياوجـدي عليـه احتريـتـه
ولو المراجل جت على كيف الانجاس=يشيـب راسـي دون شـيٍ بغيتـه
لكنهـا عنـد الطحاطيـح تنـقـاس=والطيب من وجه الـردي مارجيتـه