مضحي بن جمران
قضت المجدول الاشقر وصاحـت للعيـال=يامشاء الله يامشاء الله عمت عين الحسود
يامهجرس شاشت الروس مع بنت الرجال=ولاتجيهـا المايلـه دام حنـا فالوجـود
مهجرس الحرف
قضت المجدول الاشقر وقالت لك تعال=وانت تثني دونها كان خلاها الشرود
ودام شاشت روسكم يامحاميل الثقال=والله انا مثلكم كان عودٍ حـك عـود
مضحي بن جمران
شربها من صافي الجم قرهودٍ زلال=عدها هداج معروف من بين العدود
ورفعة صوت العزاوي وزادت بالدلال=تدري انا افعالنا كل ماننخا تـزود
مهجرس الحرف
جعلها ماتشـرب الا هماليـل الخيـال=وجعلها من زود في زود بوجيه الفهود
مير ليتك يابن جمران تحرفها شمـال=ودنا نسري على النجم والمعنى سنود
مضحي بن جمران
يامهجرس يابيض الوجه مافيهـا جـدال=ولاعن الجزله هل الجزل يرضون الصدود
في يديك خطامها ياراع الـراي العـدال=حرة وتسابق الريـح مفتولـة عضـود
مهجرس الحرف
دام هاذا راي مضحي نعرضها الجبال=لاتحول بالسهل لين تدخل باللحـود
نحسب انك تنقض احبال وتعقد حبال=واثرك اللي بالمثل لايسوق ولايقـود
مضحي بن جمران
الحرار الشقر من طبعهـن روم الطـوال=ومانقص من فرض بالسهو تمه بالسجود
يامهجرس كيف غشيت مضحي وانت خال=اثر ودك تشعب زريق مع لقـف النفـود
مهجرس الحرف
كان غشك مايجي كود من يم الخوال=ابشر انك عمها لو تصير البيض سود
يالمدير المعتبر لـد عينـك للحـوال=الحوال مصلحه وانت ماكن لك وجود
مضحي بن جمران
اعرف اني ماتراكا على جرفٍ هيـال=واتنومس وافتخر بالثنين من الجدود
تدري انه مازعل النصر لعيون الهلال=بس بعض مشجعينه يغثـون الكبـود
مهجرس الحرف
ادري انك حر وانك من خيار الجمال=وادري انك لو تزعل تعديت الحدود
بس ماعندك مراره ولاعندك طحال=والدليل انك تواعد وتخلف بالوعود
مضحي بن جمران
مالحقنا شك بنفوسنا يابـن الحـلال=ولا على هرجك جمارك ولايبحث سدود
الرخيصه سعرها فالكسور من الريـال=بايره ماتمشي الا على الخبل الرقـود
مهجرس الحرف
وش يجيب الشك والرخص ياراع الجزال=لاتسرع تاكل القرص قـدم انـه يجـود
ودنا بالطيبـه ميـر تبغـا راس مـال=في زمان اليوم كـل المراجـل بالنقـود