خالد بن عبيد ألأحمدي=
سلام مثل العسل مبـداه=والنت كلـف بتوصيلـه
لصاحب اللي إلى بنخـاه=يسحب لي السبع من ذيله
ابو مبارك اليوبي=
ترحيب مثل الحيا محلاه=واحلى من النجم في ليله
لبيه يالقرم فـي مرقـاه=والحر مثلـك اناجيلـه
خالد بن عبيد ألأحمدي=
ترى الهوى ياعزيز الجاه=غلطان من قال ياحليلـه
يغرك بحره بغبّة مـاه=واللي يعاديـه ياويلـه
ابو مبارك اليوبي=
مابين ونـه وقولـة اه=اتبهذلو فـي تهاويلـه
مايدري ان الهوى اعماه=اللي يغنـي مواويلـه
خالد بن عبيد الاحمدي=
خلي جفا مغرم ٍ يهـواه=ويطغى على قلب صافيله
ياليت ماصالحوه اعـداه=وحدوه للصّد والميلـه
ابو مبارك اليوبي=
لاباس يا صقرنا انساه=وانسى معه كل تفصيله
دور على مخلصٍ تلقاه=يحفظلك الحب ويشيله
خالد بن عبيد ألأحمدي=
صدقت ياللي حلو معناه=فارس ولا تعثره خيله
اللي كره قربنا عفنـاه=ولا عاد نشرب فناجيله
ابو مبارك اليوبي=
نهج الرجاله على يمناه=جزل الهناديب في كيله
اما الذي عافكم عبنـاه=شرواك فالليل ندعيلـه