يامرحبا ترحيب ماهو بليه = ترحيب من عيني الى العين ذيه
لهل الوفا والجود والنار حيه = اللي كسب كل المراجل بيمناه
يافايز القاف لجلك نعسمه = نبعد ردي القاف ونمد دسمه
ونختم على مبداه بختام وسمه = مثل الزين يوماً وسمناه
الليل يافايز نبي نطرق الباب = مادام قلبك من هدب عينها ذاب
مادونها مجناب لو راحت رقاب = والسيف لجل الزين حنا حملناه
حنا حمنا السيف والراي باراي = كز الذلول وردها يمنا جاي
ماعاد بعد اليوم لو قيل غزاي = وابشر بعزك يوم حنا نويناه
حنا هدفنا الزين والله يخليه = نبي نجيب الزين بطناب اياديه
لو كان عم الزين واقف يناديه = علماً على أشناب النشاما فرضناه
زين البكار اللي يدفع لها السوق = لوكان في قلبك لها زايد الشوق
معذور ياقلباً على الزين محروق = كم واحداً من عشق خله فقدناه
العشق نار وجمرها دوم وقاد = من حد قلبه على الود حداد
ليله طويل ومادخل عينه رقاد = سهران في رجوى خليلاً تمناه
ياهل الهوى من قال هذا حصلي = يشرب صفا من عّد خله يعلي
ماينفع العشاق يوم التسلي = كيفً من الدله مصفا شربناه
مافاد للعينين لوهي تعاين = ماينفع الآ علم لزين كاين
لاحْتّك من فوق المكاين مكاين = ياما حلآ مشروب عّداً وردناه
أما لقيت البحر بالحيل غايش = من كثره ماناشه من الناس نايش
ولآ طلع مصيون من كل هايش = ياجوهراً مكنون حنا كسبناه
ياطيب ذاك العّد ياالذيب سرحان = ماشام عن ذوقه سلايل كحيلان
كم وحداً يرويه لوكان ضميان = مارود من عصراً سبق مالحقناه
تمت وديناً على النفس توفيه = يامن تبع سنة نبيه وهاديه
في شبت العمر ولآ في تاليه = صلو على منهو في دينه تبعناه