انا ابا ستعين الخالق الرازق الرحمن =وابا اكتب جميع اللي نويت اشرحه كلّه
اباعرض على مرزوق علم تحت عنوان = مواضيع صارت لغز وابانتظر حله
انا قصتي فبها اكثر المجتمع حيران = قديمه جديده مصدر الخبث والخله
ابي رايه الصايب ومن يستعين يعان =لعله يبين درب انا كنت مادله
انا يالمزيني لي خوي طلع خوان =خوي ملازمني وهوخارب المله
خوي تبعني لاهو جني ولاهو انسان = احبه وهو يقضي على الحال ويسله
اثرخوة الملعون من نزغة الشيطان =لاانه تغلغل داخل الحال واحتله
انا اقدره واغليه وادفع به الاثمان = لكنه لعين وخوته كلها عله
ليا مني بغيت اعامله كلّح النيبان = واشوف الغشش واضح ليا حل بالحله
خبيث المعرفه لايدين ولايندان = وانا ليا اختفى جيته من البعد عانن له
واجيبه بلين ورفق وافتح له البيبان = لكنه عدولي وانا صرت ما مله
لو ابغى اتعامل معه باللطف والاحسان = يعود بحقد وفي عظامي دفن غله
لكن ميزته مابه تمرّد ولاعصيان =ولايتبع الانسان قدام ياذن له
وانا منخدع في خوته ماضي الازمان = بداية غلط واستغفر الله عن الزله
فلا انته رفيق له ومن رافقه خسران = ولانته خبير به ولانته خوي له
لكنه مشى في كل شبر من الاوطان = وليارافق الانسان خلاّه عبدله
ولاهو خفي اخفيه والمختفي مابان = ولاهو وفي وبين امره مع الشله
لعلك توافيني براي معه برهان = ترى النفس من بعض الطواريق منحله
ولاتجيب لي راي قريب من الاذهان = ولاتشير به ليه ولاتقول لي خله
تحدث برايك عقب ماتنصب الميزان =ترى من عطيته صايب الراي تحسن له

هلا مرحبا والقاف تفتح له البيبان = على الدرفتين بمدخل السور والفله
هلا مرحبا با لسايق الكبتن القبطان = بعث لي بلغز وقال لي ينتظر حله
ولااقول له لين ولااقول له صوان = لازال الخبر مجهول جسمه تحت ظله
نصب لي هدف ويقول ترم الهدف باتقان =ولاقول له ضمه ولاقول له خله
وضعني بموقف حرج في قصة النيشان = ولاهو بقدر لي ولاهو بمدله
ومنعني لابوح بسر عن علة المرضان = يخاف المريض ليا درى ويش يحصل له
لكني عزمت اعالج السم بالقران =والا بكية مع مدخل السم تدخل له
وزعت العلاج اثلاث ثلثين دون اعلان = والثلث الاخير لصاحب الشان ثلث له
حداني على المسرا راع الناظر السهران = بعث لي مراسيله وانا لازم ارسل له
كلام من الوجدان تصخر له الوجدان = على سلم المرجان يصعد وتنزل له
لقيت الهدف ماهو بكادي ولاريحان = ولاهو بخال له ولاهو بعم له
لقيت ابوخالد صاحبه طير بن برمان = على كف خمسه حط حطاب وشتله
صديقك عدوك من فصيلة عوج دخان =صديقك عدوك وانت بالحبل ممهل له
نزل بك على غير الرضا فوهة البركان = تشوف الخطر واضح ولكن تحمل له
معك قو باس ونابغه لكن الحرمان = جبرك الهوا تدفع ثمن علبة الجله
لانته بجابان ولاانته قطيع لسان = لكن النصيب ليا ربض يعلن الذله
رفيق الردى يردي ولوهو ولد سلطان =يهين الكريمه لين تخضع توسل له
وانا اقول من يركب جواده بدون اعنان = عدوه رديفه والمحابيل تحبل له
عمود الخطا من بالخطا جامل الخلان = وبعض المجامل بالخطا مصدر الخله
حسب علمي المحدود شان الصداقه شان =وصديق يجامل مع صديقه عدو له