سلام الله علي رووس الشيوخ كبارهم وصغار(=) عــن وجيـه النشـاما سقت فنجالي بقهويها
تفهق فيه بنه وأشتهى هيله وكــن وحــار(=)بعد جاته مسابيقه تبلور من منـــــاشيها
وبعد ماخالطه هيله شفق جاء الدور يالمسمـار(=)وسط ذيك الدلال اللي تنــشمى من يـسويها
علي جال أشقرٍ لـونه خرز ماهو بفص أسوار(=) نظم بعضـه علي بعضه حياء والسلك حاويها
حمار اللـمبه اللي ضـمها برج أبـرق الرادار(=) عـلي راسـه ليامـد يت شوفك في حراويها
صـغارٍ مابـشقرتهن فـتور ولابـهن كــبار(=) مصـففهن غـلامٍ سـلوتـه يـومه يداريها
شـذاها لانتـشر كـنه يرحـب مشتهي الخطار(=)شغامـيم الـرجال اللي شـذا الدله يشهويها
وسـلامي يافـياض داجـها معـزي وصار دار(=)بعد ماشـد صـوته وأعتزى والعين مشقيها
طرد منها النعاس وبدله سهر وسمو وأصـرار(=)سرى معه اربـعين وطرقـته ياحي ساريها
تخاضعله رقاريـق الـنفود وتطلــبه يخـتار(=)علي أسهلهن دروب يدور أصعبهن ويعطيها
يروم الكايـده روم العزيز اللي بــجوفه نـار(=)لامر العــد يشـرب من قـراحه مايطفيها
علـي ظـهر أبلـجٍ لاهـو بلابـنزٍ ولافـكسار(=)ولاطـب الـزفلـت بسفرته لاصـار ناويها
ليامـنه مـشى درهم شـمام ولانهـمله ثـار(=)يشــغل مابراسه في عصـاته يوم يوميها
وليامـن صـاح له لم اربـعه ثم أستشد وصار(=)مــثل حـرٍ لمح خربٍ قريب ومرتهي فيها
طريـقه ضـيعة الفكـر الـفطين ومقتفي الآثار(=)يوطــي بأربــعه مـره ومره مايوطيها
تشــوف له تقــل يركض تبرق زود كنه طار(=) مرادف له خــلافه عــجةٍٍ تشفق يباريها
وصـل حـد الرياض وهـد بابه فاليـمين جهار(=)يمـــينٍ جــعلها فالخلد ياربي تجازيها
دخـل مـعه الله اكـبر والصلاة وعدل واستقرار(=) دخـل معه الأمان وحاجة المحتاج قاضيها
دخـل معه الــتقي المؤمن بمصحف وباستغفار(=)ماهو عن ذنبه الا ذنوب من قبله مسويها
تشـهد وأنــهمر رزقه علـيه من السما مدرار(=) رزق ربي علي كفه قلوب الجوع طـاويها
وبـعد ماراح يـبقى فالرمـل من ريـحته تذكار(=)تـناقلها الهـبايب وسـط داره ماتـعديها
تنفـسها الصـدور اللي تـرحمله مـع الاسحار(=) تبي تفنى الصـدور ودعوةٍ له دوم تدعييها
وحكمها الـيوم حماي الجيوش وعمرنا المختار(=)ياحـي حجـاجه اللي رميته تدمي مراميها
ياحـي عـقاله اللي لاعـتزى وأنهى ودمه فار(=) ليـاوصل الـكلام لــحد داره مايــثنيها
كـفوفه مـثل مـرزوم الخـيال ومده الأمطار(=)يموت مـدور الـحاجه غنى لاصار معطيها
أبو مـتعب ولاجـات القصايد فــيه والاشعار(=) بــيوت الشعر تحسد لاذكرته من قوافيها
ملـيك للـقلوب أبـو الـيتامى موفي الأشبار(=)مــلاك الرحمة اللي خصها للدار باريها
وأبـو خـالد ومن ينسىالحكيم الملهم البيطار(=) ليـاجات الصحايف دور اسمه في معاليها
هنـاك حدود للـمجد الـطويل وعاصمه وديار (=)هـناك فـوسط دولـه دولة ٍ شيد مبانيها
هـناك عـيون تـرقب للفقير اللي زمانه جار(=) هناك كفوف تعطي من رضا مايوم تحصيها
هـناك أسـم لـسلطان الصخى تسريبه الأذكار(=) قصيدة فخر كاتبها الزمن والجود حاديها
وهنا زرعـك كبر ياسـيدي فيـنا وصار أثمار(=)هوينا من غـلاك هوايتك مادمت هاويها
ياأمير للـتراث الـلي صدى اسمك منوة الشعار(=)غني الحظ من جاب اسم مشعل في مباديها
تراودني علي اسمك من مزاين هالقصـيد بكار (=)تسـابق كل وحـده ودها تـسبق وابديها
يازيـزوم الجمايـل بالـنيابه عن جموع كثار(=) لك العرفان ياتـاج الجمايل وأنت راعيها
تفتح فالفياض الجـرد من وطـيتك فيها ازهار(=) وفقلوب الـنشاما حـي لـيلتنا ومحييها
مـشرفنا هـنا ياســيدي يانــادر الأحـرار(=)عسى عمـرك طويل ومقبلاتن لك لياليها
قبيلة حـرب لك ياســيدي تـرفع شكر وإكبار(=)وتـجدد فالولاء وعهودنا اللي مانخليها
تحـول صـدورنا دون الوطن لاوسـوس الغدار(=)نبيـع أرواحنا وبـلاثمن يالـيت نوفيها
نـسوق أغلـى مكاسـبنا عشانه غالي الاسعار(=) مـعاريف الجـمايل مالها الا مايساويها
نـرِد للـموت لـجل الدار لاغض الزمان ودار (=)ويجي في روسنا تصديعه تتعب مداويها
لـنا بيـعة وفـاء لاثـار دخـان الرمك من نار(=) يرِد منا الصغير لشربةٍ تروى ضواميها
عرابـين الـوفا مـاهي فـتاوي خــاين ثرثار (=)يبشر فالـجنان وربـي الوهاب يعطيها
سمـع منه الهبـيل الناقص المستضعف المنهار (=)سرت فيه الخيانه سود الله من يسويها
نسى إنا فـوقها مثل الغـمام وفي نحرها أسوار (=)تسابقنا الشهادة مقبلين فوق اراضيها
نعم من دونـها حـنا عمـر وبـلال والأنـصار(=)نعم من دونها بيعة فداء والكل شاريها
نعم من دونها لاصــوتت يامرخص الاعمار (=)صدور عيالها تشبع ضما يالين نرويها
نعم والله لجل طـهر الحرم والركن والزوار (=)نعم والكعبه اللي خصها ربي وحاميها
نعم وحدودها اللي رسمها دم وفخرها شعار(=)عهد منا نموت ومن بغاها ماحلم فيها
كذا ربـي خلقنا سيدي من غـير مانـختار(=) رضعنا من وفاها وأكبرت فينا عزاويها
وصلاة الله علي المرسل هداء والرحمه المختار(=)بدى فالنور من وطية ثراها وأندفن فيها