من اوسع نطاق المعرفه واجمل الاحلام=ابا ارسم ملامح سيرة الوقت وابنيها
مدام الحبر دم الامل والضلوع اقلام=عيون الشعر تشره على من يبكيها
يصيح اليقين ليا اسرجت خيلها الاوهام=تضيق الدروب ويعطي القوس باريها
يذوب الكلام بصمت في شفة الايتام=من الجوع مهما عزة النفس تغنيها
تمد النظر ويضيع في زحمة الايام=تموت بشموخ ولاتغير مباديها
متى ينفرج هالضيق وتذعذع الانسام=يدور الزمن وتحقق الناس امانيها
لو إن العقال يحس في شرهة البسام=ماضاعات حقوق وصفقة ناس بيديها
دروب الندم في شوكها تحفي الاقدام=متاهات ياما ضيقت صدر ماشيها
تعبت اسرج خيول الرجاء وارفع الاعلام=افل الشراع وعاتي الريح تطويها
اورد مشاريهي وترجع علي حيام=ياشين الجروح اليا تعثر مداويها
حروف الهجاء لو قدرت تحطم الارقام=لقيت الجُمَل محتفظةٍ في معانيها
الالوان تشكي من جفى ريشة الرسام=جميع المعالم جاير الوقت ماحيها
وش اللي تركه الوقت ياعالم الاهرام=بقايا عروشٍ كلها رايحه فيها
زمانٍ ترك من قسوته كل شيء حطام=بطش بأهل الهقوات وأخلف هقاويها