قال الحويفي يبدع القاف ويقول = يبدع من الأمثال وجزل القوافي
يالله عسى هرجي مع الناس مقبول = مثل المطر ماهو عجاج وسوافي
وسامكم مثل الذهب صار مصقول = مثل الذهب يغنيك لاجاك كافي
وخلاف ذلك و إسمعوا صامل القول = هرج ً منزه عن كثير الرجافي
أبمدح رجال المراوين وزحول = يوم المغازي والليال العجافي
لاهللوا من فوق ذربات وخيول = مامنهم اللي هو شرود ً وخافي
على العدو شر ً مسلط ومرسول = وممنوع مايطرون قول النكافي
لو كل منهم عارف اليوم مقتول = من عربة ماقيل قدمه يطافي
هم لابتن من حرب وحرب ً على الطول = كله شيوخ ً بالمواقيف تافي
لو كبر حمله حمله اليوم مشيول = تشبه لذود ً درهمت بالفيافي
وحربي مدح ربعه بغيثن وهملول =حربن هلي لوهم بحد الضفافي
ولا أقول أنا هالطيب مخصص ومقلول = كل القبايل به ردي وسنافي
واليوم في خير ونعمه ومكفول = بحكم السعود وكل مي ً وصافي
صقر الجزيره حام في نجد ويجول = فوق الركايب والسيوف الرهافي
خلف صقورا ً بانت اليوم بفعول = هذاك أبو متعب على الشعب ضافي
رحمه على شعبه ولا قال مشغول = رحب بزواره ومن جاه لافي
ندعي عسى سلطان وعكاته تزول = عساه في صحه ودوم متشافي
في عودتك نفرح كما فرحة سيول = مثل الحيا بالأرض وخيرك يشافي
وصلاة ربي عد عرضه مع الطول = على نبياً عد سعي وطوافي