يافيصل أنا أوصيك لاجيت زراع=لاتزرع ألا اللي مدرها يبشر
أما وسط وادي ولا لها تلاع=والداحمه خير(ن) من اللي منشر
ترى البلاد الطارفه كلها نزاع=يومي لرعيان البهايم توشر
ولاتزرع اللي أرضها صلبه وقاع= بعد المطر تاخذ شهر ماتعشر
جيرانك يسوقون من كل الانواع=وانته يدوبك وسط زرعك تنشر
ولاجا الفند شكيت قلت تعبي ضاع= واما تلوم بشير ولامبشر
ولاتزرع المهاب لو صيتها ذاع=زراعها دايم ملثم مكشر
وليا زرعت أغرم وشمر لك ذراع=والرزق بالهين مهو بالتقشر
ولياسالوك الناس وشلون الاوضاع=لوكان زرعك ماش بالخير بشر
مافيه غير الله جلاب الانفاع=الناس ماتعطي ولاتدفع الشر
والزرع ياتيلك على قد الاسناع=مانته محصل برتقال(ن)مقشر
ولياحصدت الزرع لاتكون طماع=أنفق لوجه الله منها معشر