قصيدة الشاعر /خالد الاحمدي صقر المراقيب
لا ضيّقـت خالـد همومـه بدنيـاه=ينخا الصديـق اللـي فـؤاده يـوده
هذاك ابو سامـي عسـى ماعدمنـاه=قولـت نعـم فـي طيبتـه ماتسـده
راعي هلا ماتتـرك الجـود يمنـاه=والطيب جالـه ورث خالـه وجـده
هيا استمع ياعالـي القـدر والجـاه=صاحبك خالـد بيّـح الوقـت سـده
يشكي عليك الحال من هول ماجـاه=دنيـا العنـا لوعاتـهـا مستـبـده
ثـارت عليـه الغامهـا بالمعانـاه=يسعى يكافـح لكـن البخـت ضـده
من بعد ماوقّف على القـاع بخطـاه=مسرع وقع فـي سهلـة ٍ مجرهـده
خط ٍ يابو سامي كتبتـه لـك اقـراه=مرسـول جالـك منتظـر منـك رده
فارقت لي مخلـوق عجبـه حلايـاه=بين العـرب بالزيـن مافيـه نـده
صدفه بـلا موعـد تلاقيـت ويـاه=شفت العجب مابيـن عينـه وخـده
حتـى سحرنـي ببتسامـة محيـاه=غـلاه يشبـه حـب الاتـي بجـده
مير البلا مخلـف عهـوده ومبـداه=طاوعبي اللي حرضـوا لـه بصـده
ومن وضعنا يشمت بي اعداي واعداه=يـوم التوتـر بينـنـا زاد حــده
وان كان يحسبني مع الوقت بنسـاه=يبقـى غشيـم وجاهـل ٍ بالمـوده
الـــــــــــــــــــــــــــــــرد
حيا الكلام اللي بعـد ماقرينـاه=قامت بيوت الشعر له مستعـده
من شاعرٍ يختار قافـه ومعنـاه=ويخوض بحر الشعر جزره ومده
مذكور في طيبه ولو ماعرفنـاه=وإن عدو الشعار.خالـد .نعـده
الاحمدي معروفٍ اصله ومنشاه=طيبه من رجال الوفـا يستمـده
يشكي علي الحال من بعد مولاه=من صاحبٍ يبني غلاه .ويهـده
وأقول ياخالد توكـل علـى الله=واللي تحـدا يارفيقـي تحـده
من لاحفظ وعده وعهده بليـاه=حب القلوب الصافيه ماهو قـده
كم قلت لك يالاحمدي لاترجـاه=لو زينه المشهـود كـلٍ يعـده
مثله عديـم المعرفـه لاتحـراه=خله يولـي جعـل مالله يـرده
حتى ولو جالك يسوقنه اخطـاه=الا إن مالك عنه يالذيب صـده
هذا كلامي وأنت حاول تحاشـاه=على الجفا والبعد حاول تحـده
مادام يسمع هرجة عداك وعداه=ولا يحتفظ بوعـوده المستبـده
خله يفارق وابتعد عنه وجفـاه=وتلقى بديلٍ له ولو عقب مـده
لاصار مايبغاك وشلـون تبغـاه=ابعد عنه ماهو بكفـو المـوده
نداء الغيداني