مرحبا في حفل ربع يعزون الضيوف=ربعةٍ تضفي على الضيف بالطيب اللحاف
ربعةٍ يوم الملاقى وسلاة السيوف=كم خصيمٍ هازهم بالغزية ثم عاف
عد من زار المدينة وفي مكة يطوف= وعد ماسطر بالاوراق من حرفٍ وقاف
واحمد الله بالرخا والامان الي نشوف=تحت ظل الدولة اللي فعايلها تشاف
تحت ظل العاهل اللي على شعبه روؤف=المليك اللي دموعه على شعبه ذراف
خادم البيتين ربي يعديه الصدوف=يحفظه ربي ويحميه من كل الصداف
واحمد الله في سلامتك يالقلوب العطوف= يابو خالد ياكفيل اليتاما والضعاف
يوم كل في سلامتك نظم بالحروف=من قبيلة حرب عشره رقوا شم الشعاف
واخذوا فيها الرياده على كل الصفوف=يوم لافي نالها وارتقى فيها وناف
واثبتوا فيها الولاء في شديدات الظروف=واثبتوا حب القبيلة لمروين الرهاف
والمواقف ثابته ماشكوا منها حفوف=بالسنين الحاضره والسنين اللي عجاف
واحمد الله راية العز خفاقه رفوف=فالجبال النايفه بالحدود اللي تحاف
يوم جردان المتاقي لدولتنا تحوف=جيشنا من دونها مثل ذيب مايحاف
خلوا الحوثي يعود بعد غزوه نكوف=يسحب اذيال الهزيمة وحاله بنكساف
ورطوه اللي لفعله يدقون الدفوف=يحسب إن المساله شرب دلة وانكفاف
مادرا انه قدم الناروالموت الهوف= والعيال اللي تخوض المعارك ماتخاف
والختام اهلا وسهلا وارحب بالضيوف=عد من لبا بمكة وسعى فيها وطاف

نداء دعاني لاحتفال الغيادين=اللي مسوينه لتكريم لافي
الحفل غالي وأهل الحفل غالين=وفاء وتقدير ومعزه لوافي
نويت أزوره يابو سامي من الحين=إن سهل الله يالحكيم السنافي
ولم لنا اللي شوحته تقطع البين=اللي مصمم لاجتياز الفيافي
يمشي من العارض بلاد السلاطين=الفجر يوم إن اكثر الناس غافي
وضحي كد عقب بريدة على يمين=ودخنة مقر اسلافنا له ملافي
أخوان من طاع الله وفزعة الدين=لجنوبهم عن التجاضع تجافي
لاحل ثلث الليل من عقب ثلثين =مافيه محرابٍ به النور طافي
أحيوه بالمصحف وهدي الصحيحين=ونفوسهم من كل باطل نظافي
الصادقين المخلصين النقيين=اللي عن الدنيا الدنيه مقافي
أخيار وأحرار تقاه وصخيين=والوقت قاسي والمعيشه كفافي
وإن سد باب السلم بين الحفيفين=لهم على خط الهجوم اصطفافي
يردون للهيجاء خفاف وسريعين=وفي غيرها ماهم لك الله خفافي
أبي اتشرف في حضور الميامين=بتكريم شاعر ماعليه اختلافي
فرحه بفوز مادفع به ملايين=في حبكة المعنى وسبك القوافي
من مبدعٍ مايخلط الزين بالشين=ولايرمي الكلمة بشكل جزافي
ماهو من اللي كلمته بين قوسين=ولاحط في وسط القبيلة خلافي
يبقى مع اللي دون المجد تدوين=ونقاء البيوت النادره باحترافي
شواردٍ لسحر فيها مضامين=لامرت الناقد يعض الاشافي
نرضي بهم عينٍ ونكحل بهم عين=تظهر غلاها وأسود الحقد خافي
حبيت أشارك مع ربوعي ببيتين=وأدري ورى قافي من الناس قافي
لكن قبل تنصب لنقدي موازين=بالنقص والتقصير هذا اعترافي

يقول السلولي يوم غنا وباله طرب=بعد وصل ديرة حرب من دار شهراني
سلامي على لافي سلام الوفا عن قرب=سلامٍ يليق بقدر خطلان الايماني
وعلى كل غيداني وساير قبائل حرب=هل الطيب والناموس من ماض الازماني
هل السيف وأهل الخيل ومفرجين الكرب=لاجا للرمك عجه وللملح دخاني
ومن جالهم تقدير من شرق ولا غرب=وشمال وجنوب وكل من جالهم عاني
وانا ماخلجني مثل شعاركم ياحرب=شربتوا بحور الشعر في كل ميداني
ليا قلت هذا الشاعر اللي شربها شرب=طلع كل واحد منكم اعبر من الثاني
لو الشعر يؤخذ كان قوم عليكم حرب= على سالم ومسرح سيقً الاضعاني
لو إن لمحارب مايحصل عليكم درب=يعود عن الطمعات عايف وخسراني
ملكتوا اللسان اليعربي والكلام الذرب=مثل ماملك فوق البسيطة سليماني

سلام ياحرب من شاعر يمثل مطير=سلام ياصل قبيلة حرب بديارها
تحية مفعمه ومعطره بالعبير=مثل النفل والخزاما نفحة اشعارها
سلامٍ احلى من المغتر ودرٍ وفير=ماشملوها ولا قد علق إصرارها
حليب وحى صغيرة ماتعرف الشعير=مربعه بالشمال ويشبع حوارها
في خايعٍ شوفته ساعة تسر النظير=ناسٍ مشت به وجتبه طول اعمارها
في حفل تكريم شاعر بالصداره جدير=بنات فكره من الجزلات يختارها
لافي وشعره يخلد بالجناح الوتير=يوم إن بعض البشر تمرضك باشعارها
سلام ياللابه الي تكرمون القصير=والضيف يلقى الامن والطيب في دارها
من شاعر لاجلكم ياحرب حث المسير=يازن بيوت القصيد ويضبط عيارها
اعزهم واحترمهم والمشاعر تفير= قبيلةٍ ساميٍ بالصدر مقدارها
وفعلوهم بالهنادي والحسام الشطير=ماتنجحد لو بعضهم حاول انكارها
قبيلةٍ بالزمان الاولي والاخير=للحرب ولا الكرم مشبوبة نارها
فعولهم باقديم يشيب منها الغرير = حرابةٍ للدول وتدمر اسوارها
مستبسله والعدا ياشرها المستطير=الحرب معهم نجاه انحطت اوزارها
سمٍ سقطري على الزايم وشرٍ شرير=يموت تحت الحوافر تحت مسمارها
ماتعتدي وإن غزاها جمع عود كسير=كثر الجنايز تحير عقل قبارها
يشوف منكر بعين وعين شافت نكير=وعبره لمن سولت نفسه على أشرارها
وانا من اللابه اللي فالنهار الكبير=لطم الخشوم العصية دائم شعارها
مطير ربعي تقدي كل عقل ضرير=الخيل فرسانها والجيش باكوارها
وختامها ياولي العرش حسن المصير=في ساعةٍ تذهل المرضع عن صغارها