الليل لاطرف تجيك الهواجيس=يطري على القلب المعنى الطواري
تجيك من جور الليالي كوابيس=تاخذ معك صوله وجوله جباري
اخذت في وقت التجارب مروايس=عمري صغير ولكن الوقت جاري
ومن تجربة غيري كسبت النواميس=وكشفت فرقت الأوله والتجاري
درست والأوضاع تحتاج تدريس=وكلن بمافادت يمينه يماري
ومشيت بالدنيا ببعض التضاريس=وحددت في وقت التجارب مساري
واليوم يابن عنيز صرنا محابيس=ماكني الا منسجن وسط داري
ماغير أهوجس واجذب الصوت وقيس=أجاذب الأفكار ليل ونهاري
وطوي بيوت الشعر طوي القراطيس=وانحت صخر واسبح بحر بقتداري
النوم غايب والخلايق مناعيس=والنفس ملت والملل بنتظاري
أنا هوايه لاذكرت المجاليس=ماني من اللي جلسة البيت ضاري
شفي ومضموني وراثه وتأسيس=مضمونها ماهو علي أختياري
مضمونها بين الضلوع المقاويس=للخوه اللي يحفطون اعتباري
أونس بقلبي مثل صلي المحاميس=لامن طرتلي زاد همي وجاري
لامن سرينا بالليال الطلاميس=بالهون نمشي وسط ليل الغداري
وتزين لا لاحت بروق الغطاليس=في بر مابه لاعمار وكباري
الخوه اللي كلبوها نواميس=والكل للثاني بعرفه يباري
عنوانهم بالوقت صدق الأحاسيس=بين الرجال اللي تحفظ المساري
ماهي سواة أهل الردى والدنافيس=تحتار في عرف ولانته بداري
يمشي على عرفه بدعم الجواسيس=من عرف راسه بان حوله مواري
لاجا النهار يطش كل الفوانيس=وبالليل صارت بين بايع وشاري
قلنا وصرنا في عيونه مفاليس=ماتعرف اللي وسط راسه يداري
مصيبة" صارت بخلف الكواليس=أثارها بانت يمين ويساري
اللي لقيته بالوجيه المتاعيس=انه يولع بين الأجواد ناري
نبى انتصبر لاتقب المقابيس=ونحلها من قبل هل العباري
وترى الكبير اللي علومه مناكيس=لاصار ضايع ضاع معه الصغاري
لابد ما نصبح عليهم محاريس=وضعن جبرنا زاد فيه احتياري
نحتار بالدنيا بكل المقاييس=غصبن علينا مع زمنا نجاري
وصلاة ربي عد هل الغطاليس=على الرسول اعداد هب الذواري