نهار تسعة في ذا الحجة =ليلة عشر والصباح العيد
الناس بالحيل مبتهجة = جاني خبر مجمله تنكيد
إلحق زويد كذا الهرجة = حادث جرى له وعلم أكيد
فزيت بجنان مع رجة = ومع نفسي اقول ثم اعيد
جيته ولا حالته حرجة = وبلي معه معقّدة تعقيد
البنت في رأسها ثجة = يقطع آمل للحياة يعيد
والأم جاها الأجل فجأة = واقفو والأحزان فينا تزيد
وجانا خبر قاسي اللهجة = رِناد دنيا معاد تريد
بنتين والثالث الزوجة= والشـكر لله والتحميد
ندعي لهم بعالي الدرجة = في جنة الخلد والتخليد
والأب برحمتك نجه = وجَوده بالصبر تجويد
وإعداد ما الفجر له فجة = صلوا على ناشر التوحيد

خلك هنا لا تروح البيت = البيت خالي من الخلان
العين تدمع وأنا مليت = وادآري الحال بالكتمان
إن جيت صعبه ولو قفيت = اخاف تشره على بخيتان
حتى العزا غصب أنا عزيت = راعي وفا وانقد النقصان
ماعاد تنفع عبارة ليت = شي انكتب للعيون يبان
مانملك إلا الدعاء للميت=ندعي لهم دوم بالغفران
انا ادري إنك بذا عانيت = من شي ما كان فالحسبان
الله يصبرك فيما أبليت = ويعوضك خير مما كان
وعداد من طاف حول البيت = صلوا على المصطفى ياخوان