من عادتي وافي مع اللي يبيني=واقضي لزومه لو تعرضت الاخطار
ويالمالكي طبعك صديق ٍ يعيني=مشهود لك بالطيب يانسل الاخيار
هذي رساله تاصلك من يديني=وفيد الذي مايغدر الضيف والجار
ياعل دار ٍ شد عنها ضنيني=ينشر خبرها صورة ٍ عبر الاقمار
لاصابها زلزال يلغي حنيني=وتصبح من الزلزال ماكنها دار
اللي بذكرى منوتي تبتليني=لاشفتها هلّت دموعي كالانهار
لاصار موقعها مقابل لعيني=مجبور اشاهدها على كل مشوار
فيها لقيت اجمل ليالي سنيني=ايام يانايف مع الزين سمار
وقت ٍ مضى لقياه حق اليقيني=واصبحت ماشوفه ولا عنه اخبار
كانت يمينه تشتبك في يميني=واليوم دار الوقت والوقت غدار
ومن يامن الايام ماهو فطيني=حاله كما اللي يامن اللملح والنار
ويالله عسى من حال بينه وبيني=يوم القيامه محشره بين الاشرار
ودعوى على مكار ماتسد ديني=لاصار بين الناس يسعى بالاضرار
وراع الهوى لو كان سدّه متيني=لو طول الكتمان بيح بالاسرار
واللي يزعلهم كثيرالونيني= من عذرهم ماجربوا طعم الامرار

يالأحمدي تفـداك روحـي وعينـي=صاحب ولك بالقلب عـزه ومقـدار
مثل الذهب غالـي نفيـس وثمينـي=أشهد لكم بالطيب واكتب لك إقـرار
ياجعـل عينـك ماتشـوف الغبينـي=حسبي على ماجاك ما حل ماصـار
أنا أدري بقلبك رهيـف(ن) شجينـي=بس الزمـن ياصـاح خـوان دوار
من قصتـك قلبـي تفطـر حزينـي=ليل امس انا مانمت سهران محتـار
هيضت جرح(ن) وسط صدري دفيني=وانهل دمع العيـن عالخـد مـدرار
ذكرتني صاحب جميـل(ن) حسينـي=اللي بحبه ذقت انـا كـل الامـرار
طـاوع هـل النمـات والحاسدينـي=اممثلين الكـذب فـي كـل الادوار
لابـد مانصبـر وربــك يعيـنـي=لامن زرعت الزرع تسعد بالاثمـار
والله ياخـالـد لـوإنـك تجيـنـي=لنثر بدربـك فـل وورود وازهـار
تامر والامر الصعب يصبح هوينـي=بامر الله المعبـود عـلام الاسـرار
منزلك بين اهداب ورمـوش عينـي=صاحب ولك بالقلب عـزه ومقـدار