اعـسفـتـني الــدنيا عـــلـى كـــل طـــاروق = وخذت منها ما كتب لي نصيبي
شـبـنا عــلى وضــح النــقاء يابـو مرزوق = وشيبٍ على وضح النقاء ما يعيبي
من شـب شـاب وكـل مـطــرود مـلــحــوق = حلفت ما غطّي عن الناس شيبي
أن ما شهـدلي ماضـي العــمـر بحـقــــوق = ما زوّدتني صبغة الشيب طيبي
كــم ابلـجٍ فـي عــارضـه تـقـل غــرنـــوق = زاده على طيبه وقار المشيبي
كــبـير جـمــعٍ با الــمواجـيـب مــاثــــــوق = يدعى بدورات الحديث الأديبي
وحــكم الــفنى مــاضي عـلى كل مخلــوق = أم الكبر ولا طويل المغيبي
لــنا بغــروب الشــمـس واللــيل واشروق = آيات يفهمها الفطين اللبيبي
يامـــل قــلــبٍ مـن عــنى الــوقت محروق = ينفض معاليق الضماير صويبي
عــلى رجــالٍ باالشــهامــه لــهــم ســـوق = عز الرفيق منزّحين الحريبي
عــاشـــوا كمــا نوًّ معـــه رعــد وبــــروق = مزنٍ تعطّف بالغزير الرهيبي
وراحـوا مـراح الريـح مـع كل ساحـــــوق = ناديتهم بالصوت مالي مجيبي
دنياً بــها عـمـر المـخالـيـــق مــــســروق = يرمي شبكها بالأصيل العريبي
تســـوقــنا بـيـــّامـهـا للفــنى ســـــــــــوق = من عقّب السبعين كنه غريبي
كــم عـاش فـيها مغــريفٍ تـقـل زملــوق = ياطى على العظم الصحيح الصليبي
جـعـد الشعر جـثلٍ كما الكـحل مسحـــوق = حلو الحديث السلسبيل المصيبي
بـوّل شـبـابـه للبـطــــــولات مــعــشـــوق = في حل عسرات المصاعب طبيبي
اليـوم محـني الظهر عـظـم وعـــروق = عافه زمانه والوطن والقريبي