تهيضت ياناجي وهاضة قريحتي=بعد مارقيت من الشوامخ طويلها
تهيضت يوم الوسم لاحت بروقة=شمال وجنوب وكل عين تخيلها
وقفت اتوجد واتمنا وهاجسي=تجية الروابع حايرٍ في دليلها
ونشدت نفسي عن هواها وودها=قبل لا يجيها عن الدنيا رحيلها
وقالت لا تنشدني هواية تعرفه=يكفيك مد يديك وافر حصيلها
ليا صار مابيديك مالٍ تجودبه=يدن بليا مال واعزتيلها
ثم قلت يانفس الشقا ريحيني=الأموال ماطالت يدينن تشيلها
أنا في رجى الله معطي العطايا لمن يشا=والأرزاق يا نفسي ترى الله كفيلها
مادامت الدنيا لحيٍ زهتله=دنيا دنية بايرة في عميلها
غرورٍٍ تغر وتمكر براع الوفا=كم خيرٍ حطت بكبدة غليلها
وكم واحد جتله على الكيف والمنا=تجيله على كيفة وهو مايجيلها
ذي حالة الدنيا بعسرها ويسرها=وكثيرها عندي يساوي قليلها
هي عايفة مني وأنا عفت منها=وبصبر على صكاتها ورتكيلها
اعرف أنها تحد الناب لو أضحكت لي=تبي تظهر حفيلي الله يظهر حفيلها
هذا وأنا مثل غيري ومن جايز البشر=يومٍ تعاديني ويومٍ خليلها
أناجيك ياناجي بصادق مشاعري=بعد مانقيت من المثايل جزيلها
تهيضت من ماشفت لجل اتفسح=قبل لايجي نفسي عن الدنيا رحيلها

تمر المواقف والرسايل وتنتهي=وياكثرها مرت لا ولحدٍ دريلها
وانا ياعلي من يوم جاتني رسالتك=ماكني قريت من الرسايل بديلها
معاناة شاعر والمشاعر بدورها=تحدث عن الواقع بمايستويلها
لها تمعنتها وارسلت معها مشاعر=وسجلت من خير المعاني جليلها
مهيضك مشرافك على نايف الحجا=وهيضت من نفسٍ عطت مابقيلها
ليا فات ثلث الليل والناس نايمه=الطالع النجوم الساريه يشتكيلها
على ذكر ماتطويه محالة الدهر=يراجع حسابه والروابع يكيلها
نعم ياعلي هذي حياة نعيشها=على باب واقعها وقف مستحيلها
هذي حالة الدنيا كفى الله شرها=على غير موعد ميلها وتعديلها
تعبنا مع الدنيا وهي كلها شقا=ولاتخسر الا هامة تنحنيلها
تواعد وتخدع من يصدق وعودها=وتشعل على روس اصدقائها فتيلها
غرورٍ مع الاقبال بالوصف كنها=غنوج لعاشقها تنفض جديلها
ولا عاضبت وقفت صعيبٍ لحوقها=دبورٍ تروع يوم ترفع شليلها
عسى الله يرزقنا القناعه برزقنا=جزيل العطايا كل نفسا وكيلها
هو الخالق الرازق عليه اعتمدنا=بسط بأمره الدنيا وبأمره يزيلها
وعذرا من التقصير والعذر يقبل=من اصحابنا اللي مانسينا جميلها