سـالــم الـبـشــري=
الشعر معنى وطيب شعور=بابعث معه ودّي الشايـق
وسلام شاعر يريد الشـور=إن كان جو البشـر رايـق
أحـمــد الــزايــدي=
انغوص به في عميق بحور=مافيـه قدامنـا عـايـق
تبشر بشوري ماني معذور=مدامنـي رايـق وفايـق
سـالــم الـبـشــري=
تسلم لنا واسمع المنشـور=ولاني من الرد متضايـق
وش حالة اللي غدا مأسور=ولاعاد له فالشقـا طايـق
أحـمــد الــزايــدي=
اللي يدور على المحضور=كنه مع الجـرف متهايـق
ماينفعه طب مـن دكتـور=تلقـاه لمقابلـه تـايـق
سـالــم الـبـشــري=
خلك على النهج والدستور=لاتلتفـت خلـف وتوايـق
قصر الأمل محتويه السور=أصبح لقلب العنـا عايـق
أحمد الزايدي=
أتشوف عينك شعاع النور=اسر على النور ياسايـق
الأادمي منهـي ومامـور=طعم العسل والبصل ذايق
سالم البشري=
من شوك وقتي جنيت زهور=باسلوب ماجات بمزايق
واللي ذكرته لنا مخبور=ياراعي المنطق اللايق
أحمد الزايدي=
ماحولك أنته والاي قصور=يا الاجودي ماانت ابن شايق
ياالله لعـلك بعـد مسرور=وأنا تراني ماني ضايق
صح الله بدنك يازايدي تقبل شكري واحترامي على المشاركة في هذه المحاورة وبيض الله وجهك
أما عن حولي وماحولي نترك الحكم في المحاورة لغيرنا من الشعراء والمتذوقين