لكم اول مشاركة
واتمنى ان تنال
على استحسانكم.
.
.
.
ما باقي الا الدمعة تطيح واصيـح=بلوا عسى الله لايجيـب البـلاوي
دافعتها واخطت طريق السواميـح=وتعثرت بيـن الرجـاء والمنـاوي
ومسحتها لاتبين للنـاس واتطيـح=وتفضح خفى قلبٍ من الضيق ذاوي
لو ان حدب ضلوع قلبي مجاريـح=مسحتها من خوف بعض الحكاوي
اخاف تلقفهـا عيـون المشافيـح=وتروح من راوي على لسان راوي
اخفيتها لاتروح من دون تصريـح=وتضرب لها دربٍ بعيـد نحـاوي
والورده اللي تحت سقف ومصابيح=ذبلت قهر عقب انقطاع الرجـاوي
ودفنتها بيـن النواييـر والشيـح=وبكيت قبل تروح عنها الخطـاوي
عقب النسيم وصافيات الصحاصيح=ثـارن عليَـه مخلفـات الهقـاوي
مثل الجبال السود جنـي مدابيـح=ولاغدن مكان ولامشن بالحـراوي
على الهدف تمشي الليالي الذوابيـح=وعلى مكاوي العام زادن مكـاوي
وآقلبي اللي بين هـم وسواميـح=لاهو بلا صابـر ولاهـو بقـاوي
مثل السفينة بين الامواج والريـح=لاخانت القبطان كـل العـزاوي
تلعبي همومـي سـوات المراجيـح=واعيش مع همي وحيدٍ خـلاوي
واصك بابـي واقفلـه بالمفاتيـح=لان الجريح احيان مالـه مـداوي
مالي بدمع مثل دمـع التماسيـح=بوجيه لاترحـم ولا هـي بتـاوي
على مصايب ناس قامت تشاليـح=وعلى حلال ايتام كبرت مضـاوي
لاتشتكي للناس همـك ولا تبيـح=وخل الامـل بالله حبلـه رهـاوي
والدمعة اللي باقي شـوي وتطيـح=مسحتها من خوف بعض الحكاوي
وسلامة الجميع
اخوكم : ابو فــراس