السلام عليكم ورحمة الله وبركاته
نبارك للاخ الغالي لافي الغيداني بمناسبة فوزه في مسابقة سلامة الامير سلطان
مبروك فوزك يالافي والحقيقة تقال = انك تعبت وخلف ربي جميع التعب
تستاهل المركز الاول بليا جدال = شاعر ومع كوكبة شعار اخذت اللقب
بنيت لك بالشعر مجدٍ شمخ مايطال = كوكب مشاعرك ساطع بالشعر ماغرب
تتعب على مفرداتك والمعاني جزال = مبدع وتصنع لجمهورك سبايك ذهب
يا رابطٍ واقع الاشياء بنسج الخيال = ياشاعر الوصف في معنى وحكمة وادب
ياجاعل من ابسط الاشياء جواب وسوال = لاولعت نار شعرك صب جزله غضب
رديت للشعر بعض اللي خذته الليال = ونقيت من مفرداته مايثير العجب
تكتب بعفوية الواثق وطعم الزلال = ابيات جمهورك يغني عليها طرب
حصدت الاعجاب في شعرك جنوب وشمال = والشرق والغرب من نكهة قصيدك قرب
نحت جزل القصايد من صميم المحال = كنك تقول ان بغيتوا شي تحت الطلب
يا موطن الشعر ياقمة وروعة جمال = غير العقل والشعر طيبه وصدرٍ رحب
فرايدك صارت مع الناس مضرب مثال = اسمك بأحرف ذهب وسط القلوب انكتب
ابدعت ياستاذ شعر النظم بالارتجال = الشعر بوح المحبة والمشاعر سحب
سابقت من ضمن غيرك وانت كلك امال = تحقق المجد كان الرب اراد وكتب
امسابقات الشعر ماتقبل الاحتمال = يفوز واحد وياخذ حقه المكتسب
ولافي هو الفارس اللي صال فكره وجال = الفارس انسان مبدع والجواد السكب
اجاد وابدع وحقق مقصده والمنال = الرزق مضمون وحركة الاوادم سبب
كامل لو الناس تكمل للكريم الكمال = سبحانه منزل الايات بابو لهب
ذكرت نبذه بسيطة واختصرت المقال = والا المشاعر معينٍ بالوفاء مانضب
واختامها عد مالاحت بروق الخيال = وعداد ماخطت حروف الهجاء بالكتب
صلوا على محمد المبعوث رحمة وال = محمد الاتقياء اهل الحسب والنسب
عوض عواض الغيداني