هزيم الرعد=
ياللي لكم فالمعاني مد=وقدام لا تستمع شكواه
سلام ضافي ولا له حد=ينصى جنابك ومن يقراه

ماجد ابو مديدة=
أنا أشهد إن الصحيح يعْد=وإنت لك الطايله والجاه
ترحيب نوفيه يد بيد=ياللي تجيد المثل وبناه

هزيم الرعد=
ما دام ساس البنا مشتد=الليل يا صاحبي نبغاه
هيا استمع طالع المُجهد=اللي فدرب الهوى بلواه

ماجد ابو مديدة=
إبدي شكاويك وأنا أرصُد=وكلآ يغني على ليلاه
أنا أعرِف إن الهوى يلهد=وبلا سبب مانقول الأه

هزيم الرعد=
لي قلب يا خوي ما ينرّد=ولا يطيعني كل ما انهاه
وكل السبب من اسيل الخد=اللي بسهم الغرام رماه

ماجد ابو مديدة=
عادات سهم الغضي مايصْد=يشاغِّل القلب بين إعضاه
لكِن بالعاطفه والوِد=تبرمجُه فالذي تهواه

هزيم الرعد=
حاولت اقرب منه ! يبعد=ويزيد وسط الحنايا داه
يجني على القلب متعمّد=يرضيك هذا الذي سواه

ماجد ابو مديدة=
ماأرضى مآسا هزيم الرعد=وأسعى وأثابِر على مداواه
والمِبعِد اللي معك عنّد=أخاف بعض البشر طغّاه

هزيم الرعد=
كافي حديث الغرام يسد=ومن عندكم الحُُكم نرضاه
ما بين امرين متردد=اصبر والا تقول انساه

ماجد ابو مديدة=
محلا الهوى بين قُرب وصْد=ومسايس الخِل يامحلاه
بالصبر تتنصب المقعد=وتنول تاج الموِّد إياه