راكب اللي قيمته مثـل طبلونـه=ان دفعها كاش ون جابهـا دينـه
ان دفعها كـاش قـام الله بعونـه=ون تدينهـا عسـى ربـه يعينـه
جيب لندكروز لون الذهـب لونـه=عن يساره خط مثله عـن يمينـه
لاوقف ليـث" نواصيـه مقرونـه=يلتهب جمر الغضا في طرف عينه
كن حسه يوم يمشي على هونـه=طش وبل"يضرب القـاع بهوينـه
وكن صوته باللهب يوم يكوونـه=الشخوف اللي تلاوف لهـا كينـه
سرعته لاقالوا النـاس مجنونـه=ضلموها والضليمه ماهـي زينـه
سرعته برق" تلاعج من مزونـه=أحد شافه واحد" يقول هـو وينـه
ون ضربله عثعث" ماوقف دونـه=فـد رملـه ونفخنـه شكاميـنـه
يوم يمعج تقـل ذيـب" يرقونـه=عيال بدو"عـن ملاجيـه حادينـه
مع جراهيد الخلا يـوم يعطونـه=كن عجه لارتفـع خاتمـة سينـه
يوم ينشد منهم اللـي يطوفونـه=والكتاب قرايتـه مـن عناوينـه
عن مطبه لو مواطيـه مشحونـه=مـادرا السـواق والا مخاوينـه
المعبـد ينظـم السلـك بعيونـه=العيون تصير وحده علـى دينـه
والخطوط اللي على السيدمازونـه=تلتحـم لا كيمـولـه طباليـنـه
عن شحيح الكف يكرم دركسونـه=مايطولنه علـى الواجـب يدينـه
صنعت اللـي ربهـم مايطيعونـه=طايعين ابليس والـرب عاصينـه
مانهنيهـم علـى حـال ملعونـه=ناصف الموتر ونذكـر مسوينـه
والجيوب اللي بها الناس مفتونـه=من صنعها ليت الاجـواد داعينـه
من ركب له جيب ماباح مكنونـه=اشهد انه فايـق" عـن مثامينـه
غيروا زيته مع غيـار سيفونـه=وفللوا من حمر الاهـواز بنزينـه
شغلوا عن جمرة القيض فريونـه=والله الواقـي والاجـواد راجينـه
سايقه سنة هل الخيـر مسنونـه=الدعـا والذكـر خابـوا مخلينـه
دوس له ياسايقه ليـن كربونـه=ينطرد ويصير صافـي مصفينـه
نصه ديار" بها الـراس ومتونـه=عاصمة حرب بقسا وقتها ولينـه
في ثراها شيوخ الاسلاف مكفونه=اهـل شـداد" ماحنـا بناسيـنـه
وفوقها شيوخ لنا دروع مضمونه=ذخرناوالعلـم عنـدي براهيـنـه
مع معـزي جدهـم نفخربكونـه=بيرقه لحجـاب ركـزت نياشينـه
من شبيب اللي عداتـه يهابونـه=راعـي الحيـزا منكـل معادينـه
عقب شيوخ" عن الضيم مزبونـه=كم سجن فكو سلاسـل مساجينـه
فكة الارقـاب فـن" مـن فنونـه=بن نحيت اليا اعتزى والله معينـه
بالوجه والجاه من يخلي سجونـه=ادرك اللي في قصاصـه مثنينـه
اصل شيختهم من مزين وبطونـه=ومن فتح بابـل ودكـة مدايينـه
شيخـة متقدمـه مالهـا فونـه=مثـل مالمنبـر تقـدم مصلينـه
اخرالاحـداث بالشعـر ووزونـه=جابوا البيـرق وجابـوا ملايينـه
المـدح ماهـم بحاجـه لدندونـه=كاسبين المـدح بأفخـر ميادينـه
الحسد راعيه لـو ثـار قالونـه=مادرينـا لـو تفجـر قواليـنـه
وبامر من امره بعد كافه ونونـه=تاصلون بخير والشيـخ ناصينـه
اقلطوا في بيت شيـخ تعرفونـه=تركي بن بجـاد مانتـم بغاوينـه
بيض الله وجه من شيـد ركونـه=كبرالبيبـان واهمـل كواليـنـه
السـلام اول نطـاق" تقولـونـه=معطر"بالعـود وازكـى رياحينـه
اول قراكـم قـبـال" تحبـونـه=وكيف" يصلح على النار جاذينـه
وعود" ازرق بالمباخـر يديرونـه=وكبش" مغصب على الراس جافينه
النعم مايكفـي الشيـخ مليونـه=راعي الفزعات والمنسب مزينـه
شيخ للقالات الاجـواد ينصونـه=صدره ارحب من رحابة دياوينـه
يوم ابليس من الفرح قظظ قرونه=خيب ابوعقاب هقـوة شياطينـه
مامشا الا وظعنا مصلـح شونـه=يـوم يبعـث ثقـل الله موازينـه
روحي لراع الجميـلات مديونـه=وراع الاولى مانت لاحق بعارينـه
ترفع البيضاكما الشمس مصيونه=لتركي بن بجاد باعلـى مآذينـه
وعد ماكبر على سـرج معنونـه=النبي وأصحابه اللـي مصافينـه
وعد ماشفتـوا ومـالا تشوفونـه=الختم صلوا على جالـي الشينـه