الغيث وقـف والسبايـب خطانـا=زود المعاصي والذنـوب الكثيـره
الجو صافـي مـا يخيـل سمانـا=والبر مقحط ما نشـوف البذيـره
يا كبرها من جور هـذا الزمانـا=الشر شاع وضاع خيـر البريـره
وشلون كيف إنـا نضيـع وفانـا=ونترك حقوق اللي رزقنا بخيـره
خوفوا من اللي فوق عرشه يرانـا=حسيبنـا اللـي دايـم نستجيـره
الله علـيـم بالخـفـى والبيـانـا=والكون في كـاف ونـون يديـره
تقصيرنـا واضـح بيانـا عيانـا=من يوم سحب الغيث ما هي مطيره
والحسد شـر يالرجـال الذهانـا=سـم خبيـث بالنفـوس الشريـره
يشقا به اللي فـي حياتـه مهانـا=يقدح بصدره من لهيـب السعيـره
واللـي نهانـا سيـدي مصطفانـا=لكن مـن يقنـع نفوسـا غريـره
وقطع المواصل والرحم هو بلانـا=والجار ما يعطي حقوق القصيـره
وكلما يطول الوقت يقـرب فنانـا=والعبد غافل ما يحسـب مصيـره
يالله ترحـم ضعفنـا وتحمـانـا=من كيد شر أهل النوايا الخطيـره
وختامـهـا لله نـرفـع نـدانـا=الواحد المعبـود مـا فيـه غيـره