عديت لي في راس عيطاً من العيط=لو يسهي الطيار لحظه صدمها
اضنها اللي طاح من راسها مقيط=آخر حياته يوم عدا هرمها
بقيت لين من التعب صرت ما حيط=رجلي من الوقفه تخدّر قدمها
وأخذت من جزل المثل شبه تلقيط=ومهما يكون المستمع هو حكمها
وان كان ما شادوا بهن صح بقليط= لاطافت العمله تغير سهمها
صحيح بالأرياء تراجع وتقليط=مثل السهام الواطيه من قممها
ذكرت ساعات الندم عقب تفريط=ما ترجع الفرصه لمن لا اغتنمها
ولاينفع الميت عن القبر تحنيط=والروح خلاق البشر مستلمها
تبرا الجروح وجرح الايام ما يخيط=اللي معاليق الضماير قسمها
في عشرت الخاين تورطت توريط=حيت وحل حطيت رجلي بفمها
صدّقت هرج مربط الهرج تربيط=وطاوعت ناسٍ ماتبري ذممها
يا اصحابنا مالي عليكم مشاريط=الطيبه عنوانها هو علمها
والعشره اللي ما وراها مصافيط=متعادلٍ وجدانها مع عدمها
تصير مثل بنايةٍ دون تخطيط=منين ماجاها التعري هدمها
[/quote]