اعانق خيالك شوق واشتاق لمحياك=لك القلب كله شوق يامنتهى احلامي
طراة الحياة ولذة العمر في لقياك=عسى الله يديمك لي مادامت ايامي
انا يوم اغيب استثقل الوقت واتمنّاك=تمر الدقائق يوم وايامي اعوامي
تغيب ويغيب الإنس والحس والإدراك=ولا استحضر إلا دمعة العين واقلامي
تقول الهواجيس إنس! وشلون كيف انساك؟=انا كيف ابا انسى بارد الماء وانا ظامي
شربت المحبة واتنفس غلا واهواك=تهب الصبا واشتاق مع عذب الانسامي
ازورك بجنح الليل واسكن معاك هناك=ولاعندي الاشبه صورة وهندامي
متى..ياعذابي من متى..كم لي اترجاك.=متى ألبس ثياب العيد وافطر من صيامي؟