الغيث وقـف والسبايـب خطانـا=زود المعاصي والذنـوب الكثيـره
الجو صافـي مـا يخيـل سمانـا=والبر مقحط ما نشـوف البذيـره
يا كبرها من جور هـذا الزمانا=الشر شاع وضاع خيـر البريـره
وشلون كيف إنـا نضيـع وفانـا=ونترك حقوق اللي رزقنـا بخيـره
خوفوا من اللي فوق عرشه يرانا=حسيبنـا اللي دايم نستجيره
الله عليـم بالخـفـى والبيـانـا=والكون في كـاف ونـون يديـره
تقصيرنـا واضـح بيانـا عيانـا=من يوم سحب الغيث ما هي مطيره
والحسد شـر يالرجـال الذهانـا=سم خبيـث بالنفـوس الشريـره
يشقا به اللي فـي حياتـه مهانـا=يقدح بصدره من لهيـب السعيـره
واللي نهانـا سيـدي مصطفانـا=لكن من يقنـع نفوسـا غريـره
وقطع المواصل والرحم هو بلانـا=والجار ما يعطي حقوق القصيـره
وكلما يطول الوقت يقـرب فنانـا=والعبد غافل ما يحسـب مصيـره
يالله ترحـم ضعفنـا وتحمـانـا=من كيد شر أهل النوايا الخطيـره
وختامهـا لله نـرفـع ندانا=الواحد المعبود مـا فيـه غيـره
سلطان مطلق الغرابي الحربي=