هات القلم واكتب لي القول ياسعود=ابيات من تأليف عيسى الرشودي
حسب التسلسل واحذر النقص والزود=هرج بلا معناه مامنه فودي
ماريد يلحقني من الشعر منقود=ولاني على بعض الكلام محدودي
وجميع مايلفض من القول موجود=يحفظ ويوم البعث ضمن الشهودي
يالله بنا رحماك ياخير معبود=لطفك وعفوك لادخلنا اللحودي
ومن بعد ذا للشعر معنى ومقصود=يوم احضروا ربعي سلائل جدودي
سعيا لبو نايف راع الطيب والجود=يشكر على مايبذله من جهودي
سلام مني عد ماتذري النود=وعدد حصى الحره ورمل النفودي
سلام ياربعي بلاحد محدود=ذخري وفخري كل واحد رشودي
ورجل بلا ربعه ضعيف ومضهود=لو رأس ماله فاق كل الحدودي
ربعك ذراك ان ضدك الوقت بضدود=يقفون كل في وجوده يجودي
من طارف ربوعك ليازارك أوفود=اضحك لهم خلك بشوش ودودي
واياك والنمه ترى النار من عود=تبدا شراره كان زيدت تزودي
يشبها بين الآجاويد مقرود=ولا ولعت ينحاش عنها الشرودي
يحرق سناها الطيبين وهل الجود=ويفرح بها القلب اللغيد الحسودي
وهذ خراب الساس ناقد ومنقود=فرقا وشتى اسم بليا وجودي
والعز والله طاعتك خير معبود=طاعة قوي كلنا له سجودي