فواز الزويهري =
سلام ياطيبين الساس =في حلة أهل الكرم والجود
أسلاك قلبي تولع ماس =محتاج فني خبير لهود
عبد العزيز الزويهري =
يامرحبا بسيد الجلاس=اللي من أهل الصفا معدود
وقدام لا تاقف الأنفاس =أرسل وتستقبل المردود
فواز الزويهري=
عساك تبقى لكل الناس=تسعى وتبذل لنا المجهود
الوضع ياصاحبي حساس =لي قلب صابه سهم مقصود
عبد العزيز الزويهري=
من عادتي ما أقبل الإفلاس=حسابي فيه الوفا مرصود
وكل شيئ ياصاحبي بقياس=مهما علت فالمباني سدود
فواز الزويهري=
لولاك فالنايبه قرناس=ماجيك وقلبي غدا موؤود
في غفلة الناس صاب الباس=وسط الملا والعباد شهود
عبد العزيز الزويهري=
إهدأ وروق وخذلك كاس=لازال فيه الأمل معقود
والسهم مايرمي بقواس=إلا ووسط البنود بنود
فواز الزويهري =
كيف العنا فالذي قد داس= جمر الغضا والدوا مفقود
ماخطت اليد فالقرطاس=أطلع جبل ما مشيت مهود
عبد العزيز الزويهري =
هذا الهوى والهوى حساس =يداعب القلب دون قيود
لاهو كمنجة ولا مرواس=حتى المودة معاك تسود
حبل الوصل لا يجيه الباس=خله على حاله المشدود
يجوز لا هبهب النسناس=تلقاه كنه معك مولود