المشاركة الأصلية كتبت بواسطة ناهس الشعيفاني

يا مرحبا بأحلى تحية وترحيب= عدة نجوم ما حصينا عددها
حلو حليبٍ جيب من شمخ النيب=من ديد وضحىً يوم جاها ولدها
يا فيصل البندر تعليت بالطيب= تقدر تحل إحبالها وتعقدها
أنت ولد بندر عطيب المضاريب= عقب الحرار أللي ينومس هددها
أهل المحل ضيوف وأنتم معازيب= يا ملوكها يا سيوفها يا سعدها
مشكور يالوافي بكل المواجيب= زرت العقيّل وافتخر بك بلدها
والمملكة بنتٍ تعاف الخطاطيب= وعبدالعزيز أللي قضبها بيدها
عبدالعزيز أللي عدا عديت الذيب= وأركى على كبد المعادي نكدها
ومعه الرجال مفتلين الأشانيب = عدوا معه بالليل يوم يهجدها
ونادا المنادي في طويل المراقيب= بخزامها وزمامها دوك قدها
قامت تبسم له بود وتعاجيب= وقامت تنشر له روايح جسدها
وقف بها العاهل مهد الأصاعيب= وعدوانها من كل صوبٍ طردها
وقاد القبايل من جنوبٍ وتغريب= وشكر لها بفعولها ماجحدها
وخضر البيارق فوق شيب المحاقيب= دارٍ تنصاها ودارٍ بجدها
وحكم بها حكمٍ على حق ومصيب= مع سنة الإسلام شيد عمدها
عساه ما يعرض على كل تعذيب= يومٍ روحه روحت في لحدها
وعقب ملوكٍ حكمهم عدل وصعيب= وتمشي بزود ولا تردى جهدها
إليا وقتنا الحالي صعيب التجاريب= يا سيفها يا كيفها يا فهدها
كل الدول تنظر لرأيه وأصاحيب= وعين العدو فهد سبايب رمدها
ياليت عمره طول ما صار لشعيب= مِار النفوس مُقنّعه في وعدها
وولى عهده هو حصان الأطاليب= كل المصاعب في عزومه صعدها
وحرٍ ليادلى في كفوف المخاليب= كبدٍ يداويها وكبدٍ لهدها
وسلطان مثل السيف عمق الأصاويب= وله كلمةٍ كل الدول تعتمدها
فكره يفك معسكرات اللواليب= وعوق الخيون أللي جموعه حشدها
وترى الوطن لولا حواميه ما هيب= وناسٍ تكاتف ضدها ما ضهدها
ياملوكنا ياريف من غطه الشيب= وتفرح بكم رملاً يتيمٍ وغدها
والمملكة ما فيه شك ولا ريب= هي أمنا أللي ما نخون بعهدها
خيرٍ على راع الوطن والأجانيب= وأقول يا رب من الخير زدها
يحفظكم أللي يعلم السر والغيب= منشي المزون أللي تقافى رعدها