يا زيد أبن مبشر بقاف ٍ مثيلي =.عنوانه الطيبه بذوق ولباقه
سلام من بنت الكريم الأصيلي =.اللي بعالي نجد يرعى نياقه
سلام لا بالله ماهو قليلي = واحلى من اللي حالي ٍ في مذاقه
يا زيد شفنا منك شي ٍ جميلي =. صاير لسان الكل عند الملاقه
الاوله مشكور شكر ٍ جزيلي= والثانيه لو كان عندك لياقه
رد الجواب ان كان عندك دليلي=وعطني من الأزهار مقدار باقه
ياخوك انا قلبي صويب وعليلي= مثل إبدوي ٍ فاقد العام ناقه
ياخوك بعض الناس من عرض جيلي= اما سلمنا منه جنا نفاقه
اليا سكتنا عنه جاب الرذيلي= وإن كان جادلناه صارت حماقه
والحمد لله يوم بالي طويلي =ورجلي عن الشينات دايم معاقه
أقدر الطيّب وأعده زميلي .= واعرف معايير الغلا والصداقه
اقدره تقدير ماله مثيلي.=.وأسابقه بالطيب وأكسب سباقه
اما الردي ماله مقام ونزيلي=الناس كل الناس تبغى فراقه
اكثر علومه بين قال ٍ وقيلي=عنده طمان الهرج فن وحداقه
ناس ٍ تعشق الطيب وتصهل صهيلي= وناس ٍ تعشق الشر دايم عشاقه
والطيب ما يعرف خضيري قبيلي = الطيب بالطيّب تكون العلاقه
والفرق واضح بين طيب وهزيلي = مثل السماء والأرض واسع نطاقه